ಡಿಸೆಂಬರ್ 3ರಿಂದ ಮೀಶೊ ಐಪಿಒ

ನವದೆಹಲಿ: ಇ–ಕಾಮರ್ಸ್ ವೇದಿಕೆ ಮೀಶೊ, ಸಾರ್ವಜನಿಕರಿಗೆ ಷೇರು ಮಾರಾಟ ಮಾಡುವ (ಐಪಿಒ) ಮೂಲಕ ₹5,421 ಕೋಟಿ ಬಂಡವಾಳ ಸಂಗ್ರಹಿಸಲು ಮುಂದಾಗಿದೆ.

ಪ್ರತಿ ಷೇರಿನ ಬೆಲೆಯನ್ನು ₹105ರಿಂದ ₹111ಕ್ಕೆ ನಿಗದಿಪಡಿಸಿದೆ. ಡಿಸೆಂಬರ್ 3ರಿಂದ 5ರವರೆಗೆ ಷೇರುಗಳಿಗೆ ಬಿಡ್ ಸಲ್ಲಿಕೆಗೆ ಅವಕಾಶ ಇರಲಿದೆ ಎಂದು ಕಂಪನಿ ಶುಕ್ರವಾರ ತಿಳಿಸಿದೆ. ಆರಂಭಿಕ ಹೂಡಿಕೆದಾರರು (ಆ್ಯಂಕರ್ ಇನ್‌ವೆಸ್ಟರ್ಸ್‌) ಡಿಸೆಂಬರ್ 2ರಂದು ಐಪಿಒಗೆ ಅರ್ಜಿ ಸಲ್ಲಿಸಬಹುದಾಗಿದೆ ಎಂದು ತಿಳಿಸಿದೆ. ಆಫರ್ ಫಾರ್ ಸೇಲ್‌ (ಒಎಫ್‌ಎಸ್‌) ಮೂಲಕ 10.55 ಕೋಟಿ ಷೇರುಗಳನ್ನು ಮಾರಾಟ ಮಾಡಲಿದೆ.