ಸುಲಲಿತ ಉದ್ದಿಮೆ ಆರಂಭಿಸಲು ಹೊಸ ‘ಇ–ಫಾರ್ಮ್‌’ ಪರಿಚಯ
ನವದೆಹಲಿ: ಉದ್ದಿಮೆ ಆರಂಭಿಸುವ ಪ್ರಕ್ರಿಯೆಯನ್ನು ಇನ್ನಷ್ಟು ಸುಲಭಗೊಳಿಸಲು ಕೇಂದ್ರ ಸರ್ಕಾರ ಸಮಗ್ರ ಸ್ವರೂಪದ ವಿದ್ಯುನ್ಮಾನ ಅರ್ಜಿ (ಇ–ಫಾರ್ಮ್‌) ಪರಿಚಯಿಸಿದೆ.
ಇದೇ 15 ರಿಂದ ಅಸ್ತಿತ್ವಕ್ಕೆ ಬರಲಿರುವ ಉದ್ದಿಮೆಗಳಿಗೆ ಹೊಸ ವ್ಯವಸ್ಥೆಯಡಿ 10 ಸೇವೆಗಳನ್ನು ಏಕಕಾಲಕ್ಕೆ ಒದಗಿಸಲು ’ಇ–ಫಾರ್ಮ್‌’ನಡಿ ಕ್ರಮ ಕೈಗೊಳ್ಳಲಾಗಿದೆ. ಇದರಿಂದ ಉದ್ದಿಮೆ ಆರಂಭಿಸಲು ಸಮಯ ಮತ್ತು ವೆಚ್ಚದ ಉಳಿತಾಯವಾಗಲಿದೆ ಎಂದು ಕಂಪನಿ ವ್ಯವಹಾರಗಳ ಸಚಿವಾಲಯ ತಿಳಿಸಿದೆ.
‘ಇ–ಫಾರ್ಮ್‌’ ಮೂಲಕ ಕಾರ್ಮಿಕ ಸಚಿವಾಲಯ ಮತ್ತು ಹಣಕಾಸು ಸಚಿವಾಲಯದಲ್ಲಿನ ರೆವಿನ್ಯೂ ಇಲಾಖೆಯು ಕೆಲ ಸೇವೆಗಳನ್ನು ಒದಗಿಸಲಿವೆ. ಹೊಸ ಕಂಪನಿಗಳು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ) ಮತ್ತು ಉದ್ಯೋಗಿಗಳ ರಾಜ್ಯ ವಿಮೆ ನಿಗಮದಲ್ಲಿ (ಇಎಸ್‌ಐಸಿ) ನೋಂದಣಿ ಮಾಡಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ.
ಶಾಶ್ವತ ಖಾತೆ ಸಂಖ್ಯೆ (ಪ್ಯಾನ್‌), ಮೂಲದಲ್ಲಿಯೇ ತೆರಿಗೆ ಸಂಗ್ರಹ ಮತ್ತು ಕಡಿತ (ಟಿಎಎನ್‌) ಮತ್ತು ಬ್ಯಾಂಕ್‌ ಖಾತೆ ಆರಂಭಿಸಲು ’ಇ–ಫಾರ್ಮ್‌’ ನೆರವಾಗಲಿದೆ. ಸರಕು ಮತ್ತು ಸೇವಾ ತೆರಿಗೆ ಪಾವತಿಯ ಗುರುತಿನ ಸಂಖ್ಯೆಯಾಗಿರುವ ಜಿಎಸ್‌ಟಿಎನ್‌ಗೆ ಅರ್ಜಿ ಸಲ್ಲಿಸಿದ್ದರೆ ಅದನ್ನೂ ವಿಳಂಬ ಇಲ್ಲದೆ ಹಂಚಿಕೆ ಮಾಡಲಾಗುವುದು. ಕಂಪನಿ ವ್ಯವಹಾರಗಳ ಸಚಿವಾಲಯದ ಅಂತರ್ಜಾಲ ತಾಣದಲ್ಲಿ ಹೊಸ ಅರ್ಜಿ ಭರ್ತಿ ಮಾಡಬಹುದು.
ದೇಶದಲ್ಲಿ ಸದ್ಯಕ್ಕೆ 11.5 ಲಕ್ಷಕ್ಕೂ ಹೆಚ್ಚು ನೋಂದಾಯಿತ ಕಂಪನಿಗಳಿವೆ. ಪ್ರತಿ ತಿಂಗಳೂ ಸಾವಿರಾರು ಕಂಪನಿಗಳು ಹೊಸದಾಗಿ ನೋಂದಾವಣೆಗೊಳ್ಳುತ್ತಿವೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.