‘ಎಂಎಸ್‌ಎಂಇ’ಗಳಿಗೆ ನೆರವು ಕೇಂದ್ರ ಸರ್ಕಾರದ ಚಿಂತನೆ

ನವದೆಹಲಿ: ‘ಕೊರೊನಾ–2’ ವೈರಸ್‌ನಿಂದಾಗಿ ಸಂಕಷ್ಟಕ್ಕೆ ಸಿಲುಕಿರುವ ಕಿರು, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ (ಎಂಎಸ್‌ಎಂಇ) ಸಾಲ ಮರುಪಾವತಿಗೆ ಹೆಚ್ಚು ಕಾಲಾವಕಾಶವೂ ಸೇರಿದಂತೆ ವಿವಿಧ ಪರಿಹಾರ ಕೊಡುಗೆ ಪ್ರಕಟಿಸಲು ಕೇಂದ್ರ ಸರ್ಕಾರ ಆಲೋಚಿಸುತ್ತಿದೆ.

ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರ ಜತೆಗೆ ‘ಎಂಎಸ್‌ಎಂಇ’ ಸಚಿವಾಲಯದ ಹಿರಿಯ ಅಧಿಕಾರಿಗಳು ಶುಕ್ರವಾರ ನಡೆಸಿದ ಸಭೆಯಲ್ಲಿ ಪರಿಹಾರ ಕೊಡುಗೆಗಳ ಬಗ್ಗೆ ಚರ್ಚಿಸಲಾಗಿದೆ.

ಈ ವಲಯಕ್ಕೆ ವಿತ್ತೀಯ ಬೆಂಬಲ ನೀಡುವುದು, ಸಾಲ ಮರುಪಾವತಿ, ಜಿಎಸ್‌ಟಿ ಪಾವತಿ ಮುಂದೂಡುವುದು ಸೇರಿದಂತೆ ಹಲವಾರು ಕ್ರಮಗಳನ್ನು ಕೈಗೊಳ್ಳುವ ಕುರಿತು ಚರ್ಚಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಈ ವಲಯವು ಕಚ್ಚಾ ಸರಕು ಪೂರೈಕೆ ಮತ್ತು ಬೇಡಿಕೆ ಕುಸಿತದ ಸಮಸ್ಯೆಗಳನ್ನು ಎದುರಿಸುತ್ತಿದೆ.