ಚಿನ್ನದ ನಾಣ್ಯ ಖರೀದಿಗೆ ಎಟಿಎಂ!

ಮುಂಬೈ: ಒಂದು ಬಟನ್ ಕ್ಲಿಕ್ ಮಾಡಿದರೆ ಚಿನ್ನದ ನಾಣ್ಯ ನೀಡುವ ಎಟಿಎಂ ಯಂತ್ರವು ಹೈದರಾಬಾದ್‌ನಲ್ಲಿ ಕಾರ್ಯ ಆರಂಭಿಸಿದೆ. ಇದು ನೋಡಲು, ನಗದು ನೀಡುವ ಎಟಿಎಂ ಯಂತ್ರದಂತೆಯೇ ಕಾಣುತ್ತದೆ.

ಈ ಯಂತ್ರವು 0.5 ಗ್ರಾಂನಿಂದ ಗರಿಷ್ಠ 100 ಗ್ರಾಂ ಇರುವ ಚಿನ್ನದ ನಾಣ್ಯವನ್ನು ಗ್ರಾಹಕರಿಗೆ ನೀಡುತ್ತದೆ. ಗೋಲ್ಡ್‌ಸಿಕ್ಕ ಕಂಪನಿ ಈ ಯಂತ್ರವನ್ನು ಅಳವಡಿಸಿದೆ.‌

‘ಚಿನ್ನದ ನಾಣ್ಯ ಬೇಕಿರುವವರು ಆಭರಣ ಮಳಿಗೆಗಳಿಗೆ ಹೋಗುವ ಬದಲು ಈ ಎಟಿಎಂ ಯಂತ್ರ ಇರುವಲ್ಲಿಗೆ ಬಂದು ನಾಣ್ಯ ಪಡೆದುಕೊಳ್ಳಬಹುದು’ ಎಂದು ಗೋಲ್ಡ್‌ಸಿಕ್ಕ ಕಂಪನಿಯ ಉಪಾಧ್ಯಕ್ಷ ಪ್ರತಾಪ್ ಹೇಳಿದ್ದಾರೆ.

ಈ ಯಂತ್ರವು ಕಳೆದ ಶನಿವಾರದಿಂದ ಸೇವೆಗೆ ಮುಕ್ತವಾಗಿದ್ದು ಒಂದು ಬಾರಿ ಗರಿಷ್ಠ ಐದು ಕೆ.ಜಿ. ಚಿನ್ನವನ್ನು ಇರಿಸಿಕೊಳ್ಳಬಲ್ಲದು.

ಕಾರ್ಡ್‌ ಬಳಸಿ ಹಣ ಪಾವತಿಸುವುದು ಹಾಗೂ ಚಿನ್ನದ ನಾಣ್ಯ ಖರೀದಿಸುವುದು ಒಂದು ನಿಮಿಷಕ್ಕೂ ಕಡಿಮೆ ಅವಧಿಯಲ್ಲಿ ಮುಗಿಯುತ್ತದೆ ಎಂದು ಗ್ರಾಹಕರೊಬ್ಬರು ತಿಳಿಸಿದರು.