ವೇರಿಯೆಬಲ್ ಪೇ ತಗ್ಗಿಸಿದ ಇನ್ಫೊಸಿಸ್

ನವದೆಹಲಿ (ಪಿಟಿಐ): ದೇಶದ ಎರಡನೆಯ ಅತಿದೊಡ್ಡ ಐ.ಟಿ. ಸೇವಾ ಕಂಪನಿ ಇನ್ಫೊಸಿಸ್ ತನ್ನ ನೌಕರರಿಗೆ ನೀಡುವ ವೇರಿಯೇಬಲ್ ಪೇ ಪ್ರಮಾಣವನ್ನು ಸರಾಸರಿ ಶೇಕಡ 70ಕ್ಕೆ ತಗ್ಗಿಸಿದೆ. ಇದು ಜೂನ್ ತ್ರೈಮಾಸಿಕಕ್ಕೆ ಅನ್ವಯವಾಗಲಿದೆ.

ಕಂಪನಿಯ ಲಾಭಾಂಶವು ನಿರೀಕ್ಷೆಯಷ್ಟು ಹೆಚ್ಚಾಗದಿರುವುದು ಹಾಗೂ ನೌಕರರ ಮೇಲಿನ ವೆಚ್ಚಗಳು ಜಾಸ್ತಿ ಆಗಿರುವುದು ಈ ತೀರ್ಮಾನಕ್ಕೆ ಕಾರಣ ಎಂದು ಮೂಲಗಳು ತಿಳಿಸಿವೆ.

ಬೆಂಗಳೂರು ಮೂಲದ ಇನ್ನೊಂದು ಪ್ರಮುಖ ಐ.ಟಿ. ಸೇವಾ ಕಂಪನಿ ವಿಪ್ರೊ ಕೂಡ ಈಚೆಗೆ ತನ್ನ ನೌಕರರಿಗೆ ನೀಡುವ ವೇರಿಯೆಬಲ್ ಪೇ ಕಡಿತಗೊಳಿಸಿತ್ತು. ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್‌ ಕಂಪನಿಯು ತನ್ನ ಕೆಲವು ನೌಕರರಿಗೆ ತ್ರೈಮಾಸಿಕ ವೇರಿಯೆಬಲ್ ಪೇ ಪಾವತಿಯನ್ನು ಒಂದು ತಿಂಗಳ ಮಟ್ಟಿಗೆ ಮುಂದೂಡಿದೆ ಎನ್ನಲಾಗಿದೆ.

ಇನ್ಫೊಸಿಸ್‌ ಕಂಪನಿಯು ತನ್ನ ತೀರ್ಮಾನವನ್ನು ನೌಕರರಿಗೆ ತಿಳಿಸಿದೆ. ಈ ಕುರಿತು ಪ್ರತಿಕ್ರಿಯೆ ಕೋರಿ ಇನ್ಫೊಸಿಸ್‌ಗೆ ಇ–ಮೇಲ್ ಕಳುಹಿಸಲಾಗಿದ್ದು, ಉತ್ತರ ದೊರೆತಿಲ್ಲ. ಇನ್ಫೊಸಿಸ್‌ನ ಜೂನ್‌ ತ್ರೈಮಾಸಿಕದ ಲಾಭವು ನಿರೀಕ್ಷೆಗಿಂತ ಕಡಿಮೆ ಇದೆ.