ಕರೂರ್‌ ವೈಶ್ಯ ಬ್ಯಾಂಕ್‌ ಲಾಭ ಶೇ 42ರಷ್ಟು ಏರಿಕೆ
ಬೆಂಗಳೂರು: 2023–24ನೇ ಹಣಕಾಸು ವರ್ಷದ ಅಕ್ಟೋಬರ್‌–ಡಿಸೆಂಬರ್ ತ್ರೈಮಾಸಿಕದಲ್ಲಿ ಖಾಸಗಿ ವಲಯದ ಕರೂರ್‌ ವೈಶ್ಯ ಬ್ಯಾಂಕ್‌ ಶೇ 42.56ರಷ್ಟು ನಿವ್ವಳ ಲಾಭ ಗಳಿಸಿದೆ.
2022–23ರ ಮೂರನೇ ತ್ರೈಮಾಸಿಕದಲ್ಲಿ ₹289 ಕೋಟಿ ನಿವ್ವಳ ಲಾಭ ದಾಖಲಿಸಿದ್ದ ಬ್ಯಾಂಕ್‌, ಡಿಸೆಂಬರ್ ತ್ರೈಮಾಸಿಕದಲ್ಲಿ ₹412 ಕೋಟಿ ಲಾಭ ಗಳಿಸಿದೆ.
2023ರ ಡಿಸೆಂಬರ್ 31ಕ್ಕೆ ಕೊನೆಗೊಂಡ ಪ್ರಸಕ್ತ ಹಣಕಾಸು ವರ್ಷದ 9ನೇ ತಿಂಗಳಲ್ಲಿ ಬ್ಯಾಂಕ್‌ನ ನಿವ್ವಳ ಲಾಭವು ಹಿಂದಿನ ಅವಧಿಯಲ್ಲಿದ್ದ ₹768 ಕೋಟಿಯಿಂದ ₹1,149 ಕೋಟಿಗೆ (ಶೇ 49.61) ಹೆಚ್ಚಳವಾಗಿದೆ.
ಬ್ಯಾಂಕ್‌ ವರಮಾನವು ಈ ತ್ರೈಮಾಸಿಕದಲ್ಲಿ ₹2,012 ಕೋಟಿಯಿಂದ ₹2,497 ಕೋಟಿಗೆ ಏರಿಕೆಯಾಗಿದೆ. ಒಟ್ಟಾರೆ ವ್ಯವಹಾರವು ₹1.38 ಲಕ್ಷ ಕೋಟಿಯಿಂದ ₹1.58 ಲಕ್ಷ ಕೋಟಿಗೆ (ಶೇ 14.74) ಹೆಚ್ಚಳವಾಗಿದೆ ಎಂದು ಬ್ಯಾಂಕ್‌ ತಿಳಿಸಿದೆ.
ಒಟ್ಟು ಅನುತ್ಪಾದಕ ಆಸ್ತಿಗಳು (ಜಿಎನ್‌ಪಿಎ) 112 ಅಂಶಗಳಷ್ಟು ಸುಧಾರಿಸಿದೆ. ವಸೂಲಾಗದ ಸಾಲದ ಸರಾಸರಿ ಪ್ರಮಾಣವು (ಎನ್‌ಪಿಎ) ₹550 ಕೋಟಿಯಿಂದ ₹305 ಕೋಟಿಗೆ ಇಳಿಕೆಯಾಗಿದೆ.
‘ಡಿಸೆಂಬರ್ ತ್ರೈಮಾಸಿಕದಲ್ಲಿ ಬ್ಯಾಂಕ್‌ನ ಬೆಳವಣಿಗೆ, ಲಾಭ ಮತ್ತು ಆಸ್ತಿ ಗುಣಮಟ್ಟದ ವಿಷಯದಲ್ಲಿ ಸ್ಥಿರವಾದ ಕಾರ್ಯಕ್ಷಮತೆ ಪ್ರದರ್ಶಿಸಿದ್ದೇವೆ’ ಎಂದು ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಬಿ. ರಮೇಶ್ ಬಾಬು ತಿಳಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.