ಮ್ಯೂಚುವಲ್ ಫಂಡ್ ಸಂಪತ್ತು ಇಳಿಕೆ

ನವದೆಹಲಿ: ಮ್ಯೂಚುವಲ್‌ ಫಂಡ್‌ ಸಂಸ್ಥೆಗಳ ನಿರ್ವಹಣೆಯಲ್ಲಿ ಇರುವ ಸಂಪತ್ತಿನ ಮೌಲ್ಯವು ಡಿಸೆಂಬರ್‌ ಅಂತ್ಯಕ್ಕೆ ಶೇ 2ರಷ್ಟು ಇಳಿಕೆಯಾಗಿದ್ದು₹ 26.54 ಲಕ್ಷ ಕೋಟಿಗಳಷ್ಟಾಗಿದೆ.

ಸಾಲಪತ್ರಗಳನ್ನು ಆಧರಿಸಿದ ಯೋಜನೆಗಳಿಂದ ಡಿಸೆಂಬರ್‌ನಲ್ಲಿ ₹ 78,940 ಕೋಟಿ ಬಂಡವಾಳ ಹೊರ
ಹೋಗಿದೆ. ಇದರಿಂದಾಗಿ ನಿರ್ವಹಣಾ ಸಂಪತ್ತು ಇಳಿಕೆ ಕಂಡಿದೆ. 44 ಸಂಸ್ಥೆಗಳ ಒಟ್ಟಾರೆ ನಿರ್ವಹಣಾ ಸಂಪತ್ತು ನವೆಂಬರ್‌ ಅಂತ್ಯದಲ್ಲಿ ಸಾರ್ವಕಾಲಿಕ ಗರಿಷ್ಠ ಮಟ್ಟವಾದ ₹ 27.04 ಲಕ್ಷ ಕೋಟಿಗಳಿಗೆ ತಲುಪಿತ್ತು ಎಂದು ಭಾರತೀಯ ಮ್ಯೂಚುವಲ್ ಫಂಡ್‌ ಸಂಸ್ಥೆಗಳ ಒಕ್ಕೂಟವುಸ (ಎಎಂಎಫ್‌ಐ) ಮಾಹಿತಿ ನೀಡಿದೆ.

ಷೇರುಪೇಟೆಯಲ್ಲಿನ ಸಕಾರಾತ್ಮಕ ವಹಿವಾಟಿನಿಂದ ಷೇರು ಆಧಾರಿತ ನಿಧಿಗಳು ಹೆಚ್ಚಿನ ಹೂಡಿಕೆ ಆಕರ್ಷಿಸಿವೆ. ನವೆಂಬರ್‌ನಲ್ಲಿ ₹ 933 ಕೋಟಿ, ಡಿಸೆಂಬರ್‌ನಲ್ಲಿ ₹ 4,432 ಕೋಟಿ ಹೂಡಿಕೆಯಾಗಿದೆ. ‘ಸಣ್ಣ ಮತ್ತು ಮಧ್ಯಮ ಶ್ರೇಣಿ ಸೂಚ್ಯಂಕಗಳು ಇಳಿಮುಖವಾಗಿವೆ. ಹೀಗಾಗಿ ದೊಡ್ಡ ಶ್ರೇಣಿಯ ಸೂಚ್ಯಂಕಗಳಲ್ಲಿ ಹೂಡಿಕೆ ಹೆಚ್ಚುತ್ತಿದೆ. ಷೇರು ನಿಧಿಗಳಲ್ಲಿ ಇದು ಅತಿ ಹೆಚ್ಚು ಬಂಡವಾಳ ಆಕರ್ಷಿಸಲಿದೆ’ ಎಂದು ಪೈಸಾಬಜಾರ್ ಡಾಟ್‌ಕಾಂನ ಸಿಇಒ ನವೀನ್‌ ಕೆ. ತಿಳಿಸಿದ್ದಾರೆ.