ವಿದ್ಯುತ್‌ ಚಾಲಿತ ವಾಹನ ದೇಣಿಗೆ ನೀಡಿದ ಎಸ್‌ಬಿಐ

ಬೆಂಗಳೂರು: ಬೆಂಗಳೂರಿನ ವೈದ್ಯಕೀಯ ಕಾಲೇಜು ಮತ್ತು ಸಂಶೋಧನಾ ಸಂಸ್ಥೆಯ (ಬಿಎಂಸಿಆರ್‌ಐ) ಅಪಘಾತ ಹಾಗೂ ತುರ್ತು ಚಿಕಿತ್ಸಾ ಕೇಂದ್ರಕ್ಕೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾವು (ಎಸ್‌ಬಿಐ) ₹38.16 ಲಕ್ಷ ಮೌಲ್ಯದ 4 ವಿದ್ಯುತ್‌ ಚಾಲಿತ ವಾಹನಗಳನ್ನು ದೇಣಿಗೆ ನೀಡಿದೆ.

ಬ್ಯಾಂಕ್‌ನ ಕಾರ್ಪೊರೇಟ್ ಸಾಮಾಜಿಕ ಜವಾಬ್ದಾರಿ (ಸಿಎಸ್‌ಆರ್) ಅಡಿ, ವಿಕ್ಟೋರಿಯ ಆಸ್ಪತ್ರೆಯ ಆವರಣದಲ್ಲಿ, ರೋಗಿಗಳು, ರೋಗಿಗಳ ಪರಿಚಾರಕರು ಹಾಗೂ ವೈದ್ಯರಿಗೆ ನೆರವಾಗಲು 4 ವಿದ್ಯುತ್ ಚಾಲಿತ ವಾಹನಗಳನ್ನು (2 ಸ್ಟ್ರೆಚರ್‌ ಸಹಿತ, 2 ಸ್ಟ್ರೆಚರ್‌ ರಹಿತ) ಬೆಂಗಳೂರು ವೃತ್ತದ ಮುಖ್ಯ ಪ್ರಧಾನ ವ್ಯವಸ್ಥಾಪಕರಾದ ಜೂಹಿ ಸ್ಮಿತಾ ಸಿನ್ಹಾ ಅವರು ಹಸ್ತಾಂತರ ಮಾಡಿದರು.

ಈ ವೇಳೆ ಎಸ್‌ಬಿಐ ಬೆಂಗಳೂರು ವೃತ್ತದ ಪ್ರಧಾನ ವ್ಯವಸ್ಥಾಪಕ (ನೆಟ್‌‌ವರ್ಕ್-1) ಸುಶೀಲ್ ಕುಮಾರ್ ಸಿಂಗ್, ಅಪಘಾತ ಮತ್ತು ತುರ್ತು ಕೇಂದ್ರದ ವಿಶೇಷ ಅಧಿಕಾರಿ ಡಾ. ಬಾಲಾಜಿ ಎಸ್ ಪೈ, ಬಿಎಂಸಿಆರ್‌ಐನ ಪ್ರಾಂಶುಪಾಲರು ಹಾಗೂ ನೋಡಲ್‌ ಅಧಿಕಾರಿ ಡಾ. ಅಶೀಮಾ ಬಾನು ಇದ್ದರು.