ಸಾಲದ ಹರಿವು ಹೆಚ್ಚಿಸದ ಆರ್‌ಬಿಐ ಕ್ರಮ:ಮೂಡೀಸ್‌

ನವದೆಹಲಿ: ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಿಗೆ (ಎನ್‌ಬಿಎಫ್‌ಸಿ) ಭಾರತೀಯ ರಿಸರ್ವ್‌ ಬ್ಯಾಂಕ್‌ ಕಲ್ಪಿಸಲಿರುವ ಹಣಕಾಸು ನೆರವು ಸಾಲದ ಹರಿವು ಹೆಚ್ಚಿಸುವುದಿಲ್ಲ ಎಂದು ಮೂಡೀಸ್‌ ಇನ್ವೆಸ್ಟರ್ಸ್‌ ಸರ್ವಿಸ್‌ ಅಂದಾಜಿಸಿದೆ.

‘ಬ್ಯಾಂಕ್‌ಗಳು ಆರ್‌ಬಿಐನಿಂದ ಕಡಿಮೆ ಬಡ್ಡಿ ದರಕ್ಕೆ ಪಡೆಯುವ ₹ 50 ಸಾವಿರ ಕೋಟಿ ಸಾಲವನ್ನು ‘ಎನ್‌ಬಿಎಫ್‌ಸಿ’ಗಳ ಹೂಡಿಕೆ ದರ್ಜೆಯ ಬಾಂಡ್‌, ಪರಿವರ್ತಿಸಲಾಗದ ಸಾಲಪತ್ರಗಳಲ್ಲಿ ಹೂಡಿಕೆ ಮಾಡಬೇಕಾಗುತ್ತದೆ. ಇದರಲ್ಲಿನ ಶೇ 50ರಷ್ಟು ಪಾಲನ್ನು ಚಿಕ್ಕ ಗಾತ್ರದ ‘ಎನ್‌ಬಿಎಫ್‌ಸಿ’ ಮತ್ತು ಕಿರು ಹಣಕಾಸು ಸಂಸ್ಥೆಗಳಿಗೆ ಮೀಸಲು ಇಡಲಾಗಿದೆ. ಈ ನೆರವಿನ ಹಣವನ್ನು ‘ಎನ್‌ಬಿಎಫ್‌ಸಿ’ಗಳು ತಮ್ಮ ಹಣಕಾಸು ಪರಿಸ್ಥಿತಿ ಸುಧಾರಿಸಲು ಬಳಸಿಕೊಳ್ಳಲು ಆದ್ಯತೆ ನೀಡಲಿವೆ. ಸಾಲ ನೀಡಿಕೆ ಹೆಚ್ಚಿಸಲು ಬಳಸಿಕೊಳ್ಳುವ ಸಾಧ್ಯತೆ ಕಡಿಮೆ ಇದೆ ಎನ್ನುವುದು ನಮ್ಮ ಅಂದಾಜಾಗಿದೆ’ ಎಂದು ಮೂಡೀಸ್‌ನ ಹಣಕಾಸು ಸಂಸ್ಥೆಗಳ ಉಪಾಧ್ಯಕ್ಷೆ ಅಲ್ಕಾ ಅನ್‌ಬರಸು ಹೇಳಿದ್ದಾರೆ.