ಜಾಗೃತಿಗಾಗಿ ಮಾನವ ಸರಪಳಿ

ಬಾಗಲಕೋಟೆ: ಮತದಾನದ ಮಹತ್ವವನ್ನು ಸಾರಲು ನಗರದ ವಿದ್ಯಾಗಿರಿಯ ಮುಖ್ಯ ವೃತ್ತದಲ್ಲಿ ಸೋಮವಾರ ಬೃಹತ್ ಮಾನವ ಸರಪಳಿ ರಚಿಸಿ ಗಮನ ಸೆಳೆಯಲಾಯಿತು.

ವಾರ್ತಾ ಇಲಾಖೆಯು ಸ್ವೀಪ್ ಅಡಿಯಲ್ಲಿ ಹಮ್ಮಿಕೊಂಡ ಮತದಾರರ ಜಾಗೃತಿ ಅಭಿಯಾನದ ಜಾಥಾದಲ್ಲಿ ಸಾವಿರಾರು ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ಮತದಾನದ ಮಹತ್ವ ಸಾರುವ  `ನೀವೂ ಮತದಾನ ಮಾಡಿ, ನಿಮ್ಮವರನ್ನೂ ಕರೆ ತನ್ನಿ' `ಮತದಾನ ನಿಮ್ಮ ಹಕ್ಕು, ತಪ್ಪದೇ ಮತದಾನ ಮಾಡಿ' ಮುಂತಾದ ಘೋಷಣೆಗಳೊಂದಿಗೆ ವಿದ್ಯಾರ್ಥಿಗಳು ಮತದಾನದ ಮಹತ್ವ ಸಾರುವ ಕರಪತ್ರಗಳನ್ನು ನೆರೆದ ಸಾರ್ವಜನಿಕರಿಗೆ ನೀಡಿದರು.

ಜಿ.ಪಂ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಎಸ್.ಜಿ.ಪಾಟೀಲ ಮಾತನಾಡಿ, `ಮತದಾರರ ಜಾಗೃತಿ ಶಿಕ್ಷಣದಂತೆ ಮತದಾರರಲ್ಲಿ ಮತದಾನದ ಮಹತ್ವ ಸಾರಲು ಅಭಿಯಾನ ಹಮ್ಮಿಕೊಳ್ಳಲಾಗಿದೆ. ನೋಂದಾಯಿಸಿದ ಮತದಾರರು ತಪ್ಪದೇ ಮತ ಹಾಕಲು ಯುವಕರು, ವಿದ್ಯಾರ್ಥಿಗಳು ತಮ್ಮ ಮನೆ ಮತ್ತು ಓಣಿಗಳಲ್ಲಿ ಜಾಗೃತಿ ಮೂಡಿಸಬೇಕು' ಎಂದರು. ಪದವಿ ಪೂರ್ವ ಶಿಕ್ಷಣ ಇಲಾಖೆ ಉಪ ನಿರ್ದೇಶಕ ವೈ.ಎಚ್.ಇಲಾಳ, ಜಿಲ್ಲಾ ವಾರ್ತಾಧಿಕಾರಿ ಮಂಜುನಾಥ ಸುಳ್ಳೊಳ್ಳಿ,  ಕಲ್ಯಾಣಿ ಹಾಜರಿದ್ದರು.