ಬಾರದ `ಭಾಗ್ಯ ಲಕ್ಷ್ಮಿ' ಬಾಂಡ್

ಬಾಗಲಕೋಟೆ: ಹೆಣ್ಣು ಮಕ್ಕಳ ಶ್ರೇಯೋಭಿವೃದ್ಧಿಗಾಗಿ ರಾಜ್ಯ ಸರ್ಕಾರವು 2006-07ರಲ್ಲಿ ಜಾರಿಗೊಳಿಸಿರುವ `ಭಾಗ್ಯಲಕ್ಷ್ಮಿ' ಯೋಜನೆಯ ಜಿಲ್ಲೆಯ 4139 ಫಲಾನುಭವಿಗಳಿಗೆ ಇದುವರೆಗೂ ಬಾಂಡ್ ವಿತರಣೆಯಾಗಿಲ್ಲ.

ಯೋಜನೆ ಜಾರಿಯಾದ ಬಳಿಕ ಜಿಲ್ಲೆಯಲ್ಲಿ ಇದುವರೆಗೆ 64,186 ಫಲಾನುಭವಿಗಳಿಗೆ ಎಲ್‌ಐಸಿ ವತಿಯಿಂದ `ಭಾಗ್ಯಲಕ್ಷ್ಮಿ' ಬಾಂಡ್ ವಿತರಿಸಲಾಗಿದೆ. ಆದರೆ, 2006-07ನೇ ಸಾಲಿನ 71 ಬಾಂಡ್, 2008-09ನೇ ಸಾಲಿನ 194, 2009-10ನೇ ಸಾಲಿನ 24, 2011-12ನೇ ಸಾಲಿನ 1350 ಹಾಗೂ 2012-13ನೇ ಸಾಲಿನ 2500 ಫಲಾನುಭವಿಗಳ ಭಾಗ್ಯಲಕ್ಷ್ಮಿ ಬಾಂಡ್ ಇನ್ನೂ ವಿತರಣೆಯಾಗಿಲ್ಲ.

ಬಾಂಡ್ ವಿತರಣೆಯಾಗದೇ ಇರುವುದಕ್ಕೆ ಕಾರಣ ಕುರಿತು `ಪ್ರಜಾವಾಣಿ'ಗೆ ಮಾಹಿತಿ ನೀಡಿದ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಉಪ ನಿರ್ದೇಶಕ ಎಸ್.ಎಚ್.ಪಾಟೀಲ, `ಕೆಲವು ಫಲಾನುಭವಿಗಳ ಹೆಸರು ಎರಡೆರಡು ಬಾರಿ ಮುದ್ರಣವಾಗಿರುವುದರಿಂದ ಮತ್ತು ಸರ್ಕಾರ ಎಲ್‌ಐಸಿಗೆ ಡಿಪಾಜಿಟ್ ನೀಡುವಲ್ಲಿ ಆದ ವಿಳಂಬದಿಂದ 4139 ಬಾಂಡ್ ವಿತರಣೆಯಾಗದೇ ಬಾಕಿ ಉಳಿದಿವೆ.

ಅದರಲ್ಲಿ 2006-07ನೇ ಸಾಲಿನ 71 ಮತ್ತು 2009-10ನೇ ಸಾಲಿನ 194 ಬಾಂಡ್ ಬಹುತೇಕ ರದ್ದಾಗಿವೆ. ಉಳಿದ ಬಾಂಡ್‌ಗಳ ವಿತರಣೆಗೆ ಕ್ರಮ ಕೈಗೊಳ್ಳಲಾಗುವುದು' ಎಂದರು.

ಎರಡು ವರ್ಷವಾದರೂ ಬಾಂಡ್ ಸಿಗದೇ ಇರುವ ಕುರಿತು `ಪ್ರಜಾವಾಣಿ'ಯೊಂದಿಗೆ ಮಾತನಾಡಿದ ಹುನಗುಂದದ ಫಲಾನುಭವಿ ತಾಯಿ ಸುನೀತ, `ನನಗೆ ಹೆಣ್ಣು ಮಗು ಜನನವಾದ ತಕ್ಷಣ ಭಾಗ್ಯಲಕ್ಷ್ಮಿ ಬಾಂಡ್‌ಗೆ ಇಲಾಖೆ ಅಧಿಕಾರಿಗಳು ಕೇಳಿದ ದಾಖಲೆಗಳ ಸಹಿತ ಅರ್ಜಿ ಸಲ್ಲಿಸಿದರೂ ಇದುವರೆಗೆ ನೀಡಿಲ್ಲ' ಎಂದು ಹೇಳಿದರು.