ಬಿಎಸ್‌ವೈ ಮೇಲೆ ಸಿಟ್ಟು, ಸಂತ್ರಸ್ತರಿಗೆ ಬರೆ: ರೈತ ಚಾಮರಸ ಮಾಲಿ ಪಾಟೀಲ ಆರೋಪ

ಬಾಗಲಕೋಟೆ: ‘ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಮೇಲಿನ ಕೋಪಕ್ಕೆ ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಪ್ರವಾಹ ಸಂತ್ರಸ್ತರಿಗೆ ಯಾವುದೇ ನೆರವಿಗ ಧಾವಿಸುತ್ತಿಲ್ಲ‘ ಎಂದು ರಾಜ್ಯ ರೈತ ಸಂಘದ ಗೌರವಾಧ್ಯಕ್ಷ ಚಾಮರಸ ಮಾಲಿ ಪಾಟೀಲ ಆರೋಪಿಸಿದರು.

ನಗರದಲ್ಲಿ ಭಾನುವಾರ ಆಯೋಜಿಸಿದ್ದ ನೆರೆ ಸಂತ್ರಸ್ತರ ಬಹಿರಂಗ ಅಧಿವೇಶನದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ‘ನರೇಂದ್ರ ಮೋದಿ ಚಂದ್ರಯಾನ ವೀಕ್ಷಣೆಗೆ ಬೆಂಗಳೂರಿಗೆ ಬಂದರೂ, ಸಂತ್ರಸ್ತರ ಪರ ನೆರವು ಕೋರಲು ತಮ್ಮೊಡನೆ ಮಾತನಾಡಲು ಇಚ್ಛಿಸಿದ ಮುಖ್ಯಮಂತ್ರಿಗೆ ಭೇಟಿಗೆ ಅವಕಾಶ ನೀಡಲಿಲ್ಲ. ಯಡಿಯೂರಪ್ಪ ಮೇಲೆ ಕೋಪವಿದ್ದರೆ ಅವರನ್ನು ಕಿತ್ತು ಹಾಕಲಿ, ಅದನ್ನು ಸಂತ್ರಸ್ತರ ವಿರುದ್ಧ ತೀರಿಸಿಕೊಳ್ಳುವುದೇಕೆ ಎಂದು ಪ್ರಶ್ನಿಸಿದರು.

‘ಭೀಕರ ಪ್ರವಾಹಕ್ಕೆ ತುತ್ತಾಗಿ ತಿಂಗಳು ಕಳೆದರೂ ರಾಜ್ಯದ ನೆರವಿಗೆ ಬಾರದೇ ಕೇಂದ್ರ ಸರ್ಕಾರ ಜಾಣಮೌನ ವಹಿಸಿ, ಕನ್ನಡಿಗರಿಗೆ ಅಪಮಾನ ಮಾಡುತ್ತಿದೆ‘ ಎಂದುಆಕ್ರೋಶ ವ್ಯಕ್ತಪಡಿಸಿದ ಚಾಮರಸ ಮಾಲಿಪಾಟೀಲ, ‘ಈ ದುರಂತವನ್ನು ರಾಷ್ಟ್ರೀಯ ವಿಪತ್ತು ಎಂದು ಘೋಷಿಸಲು‘ ಆಗ್ರಹಿಸಿದರು.