ಸರ್ಕಾರಿ ವೈದ್ಯಕೀಯ ಕಾಲೇಜಿಗೆ ಜಾಗ ನೀಡಲು ಮನವಿ

ಬಾಗಲಕೋಟೆ: ನವನಗರದಲ್ಲಿ ಆರಂಭವಾಗಲಿರುವ ಸರ್ಕಾರಿ ವೈದ್ಯಕೀಯ ಕಾಲೇಜಿಗೆ ತೋಟಗಾರಿಕೆ ವಿಜ್ಞಾನಗಳ ವಿಶ್ವವಿದ್ಯಾಲಯಕ್ಕೆ ಲೀಸ್‌ ಮೇಲೆ ನೀಡಲಾದ 42 ಎಕರೆಯನ್ನು ಕಾಲೇಜಿಗೆ ನೀಡುವ ಕುರಿತು ವರದಿ ಸಲ್ಲಿಸುವಂತೆ ಕೃಷ್ಣ ಭಾಗ್ಯಜಲನಿಗಮದ ಪ್ರಧಾನ ವ್ಯವಸ್ಥಾಪಕರು, ಬಿಟಿಡಿಎ ಮುಖ್ಯ ಎಂಜಿನಿಯರ್‌ಗೆ ಪತ್ರ ಬರೆದಿದ್ದಾರೆ.

ಶಾಸಕ ಎಚ್‌.ವೈ. ಮೇಟಿ ಅವರು, ಉಪಮುಖ್ಯಮಂತ್ರಿಗೆ ಜಿಲ್ಲಾ ಆಸ್ಪತ್ರೆಗೆ ಸಮೀಪವಿರುವ ಸೆಕ್ಟರ್ ನಂ.1 ಮತ್ತು 13ರ ಜಾಗವನ್ನು ನೀಡಬೇಕು ಎಂದು ಮನವಿ ಸಲ್ಲಿಸಿದ್ದರು.

ಮೇಲಿನ ಎರಡೂ ಸೆಕ್ಟರ್‌ಗಳ 42 ಎಕರೆ ಭೂಮಿಯನ್ನು ತೋವಿವಿಗೆ ಲೀಸ್ ಆಧಾರದ ಮೇಲೆ ನೀಡಲಾಗಿದೆ. ಅದನ್ನು ರದ್ದು ಮಾಡಿ ಕಾಲೇಜಿಗೆ ನೀಡಲು ಕ್ರಮ ಕೈಗೊಳ್ಳಬೇಕು ಎಂದು ಕೋರಿದ್ದರು. ಸಚಿವರ ಸೂಚನೆ ಮೇರೆಗೆ ವರದಿ ಸಲ್ಲಿಸಲು ತಿಳಿಸಲಾಗಿದೆ.