ಗುಳೇದಗುಡ್ಡ | ದೀಪಾವಳಿ; ಅಗತ್ಯ ವಸ್ತು ಖರೀದಿ ಜೋರು

ಗುಳೇದಗುಡ್ಡ: ಪಟ್ಟಣದಲ್ಲಿ ಬೆಳಕಿನ ಹಬ್ಬ ದೀಪಾವಳಿಯ ಸಂಭ್ರಮ ಮನೆಮಾಡಿದೆ. ಪಟ್ಟಣ ಹಾಗೂ ಸುತ್ತಲಿನ ಗ್ರಾಮೀಣ ಪ್ರದೇಶಗಳಲ್ಲಿ ಮಂಗಳವಾರ ಹಬ್ಬಕ್ಕಾಗಿ ಅಗತ್ಯ ವಸ್ತುಗಳ ಖರೀದಿ ಜೋರಾಗಿತ್ತು.

ಪಟ್ಟಣದ ಭಾರತ್ ಮಾರುಕಟ್ಟೆ ಸೇರಿದಂತೆ ಎಲ್ಲಾ ಅಂಗಡಿಗಳು ಜನರಿಂದ ತುಂಬಿದ್ದವು. ಚೆಂಡು ಹೂ, ವಿವಿಧ ತರಹದ ಹಣ್ಣುಗಳು, ಕಬ್ಬು, ಬಾಳೆಗುಣಿ, ಆಕಾಶಬುಟ್ಟಿ, ಆಲಂಕಾರಿಕ ವಸ್ತುಗಳು, ಬಟ್ಟೆಗಳನ್ನು ಖುಷಿಯಿಂದ ಖರೀದಿಸುತ್ತಿದ್ದ ದೃಶ್ಯ ಎಲ್ಲೆಡೆ ಕಂಡುಬಂದಿತು.

ವ್ಯಾಪಾರಸ್ಥರು ತಮ್ಮ ಅಂಗಡಿಗಳನ್ನು ಸ್ವಚ್ಛಗೊಳಿಸಿ, ಬಣ್ಣ ಬಳಿದು ಸಿಂಗರಿಸಿದರು. ಲಕ್ಷ್ಮಿಪೂಜೆ ನೆರವೇರಿಸಿ, ಇಷ್ಟಾರ್ಥ ಸಿದ್ಧಿಗೆ ಪ್ರಾರ್ಥಿಸಿದರು. ವಿದ್ಯುದ್ದೀಪ, ಹೂಮಾಲೆ, ದೀಪಗಳ ಸಾಲಿನಿಂದ ಮನೆಗಳು ಝಗಮಗಿಸಿದವು.

ಪಟ್ಟಣದ ಹಾದಿ ಬಸವೆಶ್ವರ ಗುಡಿ ಹತ್ತಿರದ ರಾಜ್ಯ ಹೆದ್ದಾರಿ, ಕಮತಗಿ ಕ್ರಾಸ್ ಮೊದಲಾದ ಪ್ರಮುಖ ಪ್ರದೇಶಗಳಲ್ಲಿ ವಾಹನಗಳ ದಟ್ಟಣೆ ಹೆಚ್ಚಾಗಿತ್ತು.