ಹುನಗುಂದ | ಅಕ್ರಮ ಚಟುವಟಿಕೆ ತಡೆಗೆ ಮಹಿಳೆಯರ ಆಗ್ರಹ

ಹುನಗುಂದ: ತಾಲ್ಲೂಕಿನ ಮರೋಳ ಮತ್ತು ಕೊಪ್ಪ ಎಸ್.ಎಂ ಗ್ರಾಮದಲ್ಲಿ ಅಕ್ರಮ ಮದ್ಯ ಮಾರಾಟ, ಸಟ್ಕಾ ಮಟ್ಕಾ, ಇಸ್ಪೀಟ್ ಹಾಗೂ ಅಕ್ರಮ ಚಟುವಟಿಕೆ ನಿಷೇಧಿಸಬೇಕು ಎಂದು ಆಗ್ರಹಿಸಿ ಗ್ರಾಮದ ಮಹಿಳೆಯರು ಪಟ್ಟಣದ ಡಿವೈಎಸ್‌ಪಿ ಕಚೇರಿಯ ಎದುರು ಶುಕ್ರವಾರ ಪ್ರತಿಭಟನೆ ನಡೆಸಿ ಸಿಪಿಐ ಸುನೀಲ್ ಸವದಿ ಅವರಿಗೆ ಮನವಿ ಸಲ್ಲಿಸಿದರು.

‘ತಾಲ್ಲೂಕಿನ ಮರೋಳ ಮತ್ತು ಕೊಪ್ಪ ಎಸ್.ಎಂ. ಗ್ರಾಮದಲ್ಲಿ ಅಕ್ರಮ ಮದ್ಯ ಮಾರಾಟ, ಮಟ್ಕಾ, ಇಸ್ಪೀಟ್ ಹಾಗೂ ಅಕ್ರಮ ಚಟುವಟಿಕೆಗಳು ಬಹಿರಂಗವಾಗಿ ನಡೆಯುತ್ತಿದೆ. ಪೊಲೀಸರುಈ ಬಗ್ಗೆ ಕ್ರಮ ಕೈಗೊಂಡಿಲ್ಲ. ಈ ವಿಷಯಕ್ಕೆ ಸಂಬಂಧಿಸಿ ಹಲವು ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಇದರಿಂದ ಶಾಲಾ ಮಕ್ಕಳು ಕೂಡ ದುಶ್ಚಟಗಳಿಗೆ ಬಲಿಯಾಗುತ್ತಿದ್ದಾರೆ. ಒಂದೆರಡು ವರ್ಷಗಳಲ್ಲಿ 5-6 ಯುವಕರು ಮದ್ಯ  ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ನಿತ್ಯ ಮನೆಯಲ್ಲಿ ತಂದೆ-ತಾಯಿ, ಹೆಂಡತಿಯರೊಂದಿಗೆ ಜಗಳ ನಡೆಯುತ್ತಿವೆ. ಇದರಿಂದ ಹಲವು ಸಂಸಾರಗಳು ಬೀದಿ ಪಾಲಾಗಿ ಸಂಕಷ್ಟ ಅನುಭವಿಸುತ್ತಿವೆ. ಅಕ್ರಮ ಚಟುವಟಿಕೆಯ ವಿರುದ್ಧ ಸೂಕ್ತ ಕ್ರಮ ಕೈಗೊಂಡು ಗ್ರಾಮದಲ್ಲಿ ಕಾನೂನು ಸುವ್ಯವಸ್ಥೆ ಕಾಪಾಡಬೇಕು’ ಎಂದು ಮನವಿ ಮಾಡಿದ್ದಾರೆ.

ಅಬಕಾರಿ ಕಚೇರಿಗೆ ಮುತ್ತಿಗೆ: ತಾಲ್ಲೂಕಿನ ಮರೋಳ ಗ್ರಾಮದಲ್ಲಿ ಅಕ್ರಮ ಮದ್ಯ ಮಾರಾಟ ನಡೆಯುತ್ತಿದ್ದರೂ ಇಲಾಖೆಯ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಆರೋಪಿಸಿ ಗ್ರಾಮದ ಮಹಿಳೆಯರು ಪಟ್ಟಣದ ಅಬಕಾರಿ ಕಚೇರಿಗೆ ಮುತ್ತಿಗೆ ಹಾಕಿ ಅಬಕಾರಿ ನಿರೀಕ್ಷಕ ವೆಂಕಣ್ಣ ರೆಡ್ಡಿ ಎದುರು ಆಕ್ರೋಶ ವ್ಯಕ್ತಪಡಿಸಿದರು.

ಗುರುಬಾಯಿ ತುಂಬಲಗಡ್ಡಿ, ಶಿವಮ್ಮ ಹಿರೇಮಠ, ಪಾಟೀಲ, ಕವಿತಾ ತುಂಬಲಗಡ್ಡಿ, ಗಿರಿಜಾ ಗೋರಬಾಳ, ಸಂಗಮ್ಮ ಮಿರೇಕೂರ, ಶೋಭಾ ಸಿಂಗನಗುತ್ತಿ, ಅಮರೇಶ್ ನಾಡಗೌಡ್ರ, ದಿಲ್ಶಾದ್ ನದಾಫ್, ಸುವರ್ಣ ತುಂಬಲಗಡ್ಡಿ, ಬಸಪ್ಪ ಕೂಡ್ಲೆಪ್ಪನವರ, ಮುತ್ತಣ್ಣ ನಂದವಾಡಗಿ, ಜಗದೀಶ ಓತಗೇರಿ ಇದ್ದರು.