ಬಾಗಲಕೋಟೆ: ಪಶು ಆಸ್ಪತ್ರೆಗೆ ಬಂದು ಚಿಕಿತ್ಸೆ ಪಡೆದ ಮಂಗ

ಬಾಗಲಕೋಟೆ: ಗಾಯಗೊಂಡಿದ್ದ ಮಂಗವೊಂದು ಜಿಲ್ಲೆಯ ಗುಡೂರು ಪಶು ಆಸ್ಪತ್ರೆಗೆ ಬಂದು ಚಿಕಿತ್ಸೆ ಪಡೆದುಕೊಂಡ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.

ಗಾಯಗೊಂಡಿದ್ದ ಮಂಗವು ಗುಡೂರಿನ ಪಶು ಆಸ್ಪತ್ರೆ ಮುಂದೆ ಡಾ.ಜಿ.ಜಿ. ಬಿಲ್ಲೋರ ನಿಲ್ಲಿಸಿದ್ದ ದ್ವಿಚಕ್ರ ವಾಹನದ ಮೇಲೆ ಬಂದು ಕೂತಿತ್ತು. ಆಗ ಅಲ್ಲಿಗೆ ಬಂದ ಡಾ.ಬಿಲ್ಲೋರ ಅವರಿಗೆ ಗಾಯವಾಗಿದ್ದ ಸ್ಥಳವನ್ನು ತೋರಿಸಿತು. ಏನಾಗಿದೆ ಎಂದು ನೋಡಿದಾಗ ಗಾಯವಾಗಿರುವುದು, ಕಂಡು ಬಂದಿತು.

ಗಾಯಕ್ಕೆ ಡಾ.ಬಿಲ್ಲೋರ ಚಿಕಿತ್ಸೆ ನೀಡಿದ ನಂತರ ಮಂಗ ಮರಳಿದೆ. ‘ನನ್ನ ದ್ವಿಚಕ್ರ ವಾಹನದ ಮೇಲೆ ಕೂತಿದ್ದ ಮಂಗವು ಗಾಯ ಆಗಿರುವುದನ್ನು ತೋರಿಸಿತು. ಚಿಕಿತ್ಸೆ ನೀಡಿದ ನಂತರ ಮರಳಿದೆ. ಯಾವುದೇ ಸಮಸ್ಯೆ ಮಾಡಲಿಲ್ಲ’ ಎಂದು ಡಾ.ಬಿಲ್ಲೋರ ತಿಳಿಸಿದ್ದಾರೆ.