ಅತ್ತಿಗೆ ಕೊಲೆ ಮಾಡಿದ ಮೈದುನ

ಲೋಕಾಪುರ: ಆಸ್ತಿ ವಿಚಾರವಾಗಿ ವೈಷಮ್ಯ ಸಾಧಿಸಿ ಮೈದುನ ತನ್ನ ಅತ್ತಿಗೆಯನ್ನು ಕತ್ತು ಕೊಲೆ ಮಾಡಿರುವ ಘಟನೆ ಮುಧೋಳ ತಾಲ್ಲೂಕಿನ ಮಲ್ಲಾಪುರ ಪಿ.ಎಲ್‌.ಗ್ರಾಮದ ಸಮೀಪ ಗುರುವಾರ ನಡೆದಿದೆ.

ಸವಿತಾ ಮಂಜುನಾಥ ಕುರಿ (30) ಕೊಲೆಗೀಡಾದ ಮಹಿಳೆ. ಆರೋಪಿ ಸಿದ್ದಪ್ಪ ವಿರುದ್ಧ ಮೃತಳ ತಂದೆ ಬಸಪ್ಪ ಲೋಕಾಪುರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಬ್ಯಾಂಕ್‌ ಸಾಲ ಪಡೆಯಲು ಪ್ರಮಾಣಪತ್ರ ಸಿದ್ಧಪಡಿಸುವುದಕ್ಕೆ ಮುಧೋಳಕ್ಕೆ ಹೋಗುವುದಿದೆ ಎಂದು ಪುತ್ರಿಯನ್ನು ಮನೆಯಿಂದ ಬೈಕ್‌ನಲ್ಲಿ ಕರೆದುಕೊಂಡು ಹೋಗಿ, ಮಾರ್ಗಮಧ್ಯೆ ಸಿದ್ದಪ್ಪ ಕೊಲೆ ಮಾಡಿದ್ದಾನೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಮೃತದೇಹದ ಪಕ್ಕದಲ್ಲಿ ಸುತುಳಿ ಕಂಡುಬಂದಿದ್ದು, ಮಹಿಳೆಯ ಕತ್ತಿನ ಸುತ್ತಲೂ ಕಪ್ಪಾದ ಗುರುತು ಕಂಡುಬಂದಿವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪೊಲೀಸರು ದೂರು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.