ಜಾತಿ, ಆದಾಯ ಪ್ರಮಾಣಪತ್ರ ಪಡೆದ ಹಕ್ಕಿಪಿಕ್ಕಿ ಕುಟುಂಬ

ಕುರುಗೋಡು: ಇಲ್ಲಿಗೆ ಸಮೀಪದ ಸಿರಿಗೇರಿ ಗ್ರಾಮದ ಹಕ್ಕಿಪಿಕ್ಕಿ ಜನಾಂಗದ ನಾಲ್ಕು ಕುಟುಂಬಗಳಿಗೆ ಸಿರುಗುಪ್ಪ ತಹಶೀಲ್ದಾರ್ ವಿಶ್ವನಾಥ ಅವರು ಬುಧವಾರ ಜಾತಿ ಮತ್ತು ಆದಾಯ ಪ್ರಮಾಣ ಪತ್ರ ವಿತರಿಸಿದರು.

ಐದು ದಶಕಗಳಿಂದ ಗ್ರಾಮದ ಜನತಾ ಕಾಲೊನಿಯಲ್ಲಿ ವಾಸವಿದ್ದ ಇವರಿಗೆ ಜಾತಿ ಮತ್ತು ಆದಾಯ ಪ್ರಮಾಣ ಪತ್ರ ದೊರೆಯದ ಕಾರಣ ಪಡಿತರ ಚೀಟಿ ದೊರೆತಿರಲಿಲ್ಲ. ಅವರ ಮಕ್ಕಳು ವಿದ್ಯಾರ್ಥಿ ವೇತನದಿಂದ ವಂಚಿತರಾಗಿದ್ದರು.

ಈ ಸಮಾಜದವರು ಎದುರಿಸುತ್ತಿರುವ ಸಮಸ್ಯೆ ಕುರಿತು ದಲಿತ ವಿದ್ಯಾರ್ಥಿ ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಲಕ್ಷ್ಮಣ ಭಂಡಾರಿ ಅವರು ಕಂದಾಯ ಇಲಾಖೆ ಮತ್ತು ಪರಿಶಿಷ್ಟವರ್ಗಗಳ ಕಲ್ಯಾಣ ಇಲಾಖೆ ಅಧಿಕಾರಿ ರಾಘವೇಂದ್ರ ಶರ್ಮ ಅವರ ಗಮನ ಸೆಳೆದಿದ್ದರು.

ಎಂ ನಾಗಮ್ಮ, ವೆಂಕಟೇಶ್, ಗೋಪಾಲ, ಜಿ.ಕೆ. ವೆಂಕಟೇಶ್, ರೋಜಾ, ಮರಾಠ ಐಶ್ವರ್ಯ, ಮೋಕ್ಷ, ಕ್ರಿಷ್ ಮತ್ತು ಅನಿಲ್ ಇವರು ಜಾತಿ ಪ್ರಮಾಣ ಪತ್ರ ಪಡೆದವರು.