ಹೊಸಪೇಟೆ: ಪಡಿತರ ಪಡೆಯಲು ಅಂತರ ಮರೆತ ಜನ

ಹೊಸಪೇಟೆ (ವಿಜಯನಗರ): ಕೋವಿಡ್‌ ನಿಷೇಧಾಜ್ಞೆ ಹಿನ್ನೆಲೆಯಲ್ಲಿ ನ್ಯಾಯಬೆಲೆ ಅಂಗಡಿಗಳಲ್ಲಿ ಆಹಾರ ಧಾನ್ಯ ವಿತರಿಸುವ ಅವಧಿ ನಿಗದಿಗೊಳಿಸಿರುವುದರಿಂದ ನಿತ್ಯ ಅಂಗಡಿಗಳ ಎದುರು ಜನದಟ್ಟಣೆ ಉಂಟಾಗುತ್ತಿದೆ‌. ಅಂತರ ಕಾಯ್ದುಕೊಳ್ಳದೆ ಜನ ನಿಲ್ಲುತ್ತಿದ್ದಾರೆ.

ನಗರದ ವಿವಿಧ ಬಡಾವಣೆಗಳಲ್ಲಿ ಕಳೆದ ಒಂದು ವಾರದಿಂದ ವಿವಿಧ ಪಡಿತರ ಚೀಟಿ ಹೊಂದಿದ ಫಲಾನುಭವಿಗಳಿಗೆ ಮೇ ಮತ್ತು ಜೂನ್ ತಿಂಗಳ ಆಹಾರ ಧಾನ್ಯ ವಿತರಿಸಲಾಗುತ್ತಿದೆ. ಬೆಳಿಗ್ಗೆ 7ರಿಂದ 10ಗಂಟೆಯವರೆಗೆ ಪಡಿತರ ವಿತರಿಸಲಾಗುತ್ತಿದ್ದು, ಫಲಾನುಭವಿಗಳು ಬೆಳಿಗ್ಗೆ 5 ಗಂಟೆಯಿಂದಲೇ ನ್ಯಾಯಬೆಲೆ ಅಂಗಡಿ ಮುಂದೆ ಜಮಾಯಿಸುತ್ತಿದ್ದಾರೆ.

ಶುಕ್ರವಾರ (ಮೇ 14) ಬಸವ ಜಯಂತಿ, ಈದ್‌–ಉಲ್‌–ಫಿತ್ರ ಇರುವುದರಿಂದ ಗುರುವಾರ ರೇಷನ್‌ ಪಡೆದುಕೊಳ್ಳಲು ಹೆಚ್ಚಿನ ಜನ ಸೇರಿದ್ದರು. ಅವಧಿ ಮುಗಿದಿದ್ದರಿಂದ ಹಲವರು ರೇಷನ್‌ ಪಡೆಯಲಾಗದೆ ಹಿಂತಿರುಗಿದರು.