ಶಾಲೆಗೆ ಬಂದು ಕಳೆ ಹೆಚ್ಚಿಸಿದರು

ಹೊಸಪೇಟೆ: ಬೇಸಿಗೆ ರಜೆ ಬಳಿಕ ನಗರ ಸೇರಿದಂತೆ ತಾಲ್ಲೂಕಿನಾದ್ಯಂತ ಸರ್ಕಾರಿ ಮತ್ತು ಖಾಸಗಿ ಶಾಲೆಗಳು ಬುಧವಾರ ಆರಂಭಗೊಂಡವು.

ಮಂಗಳವಾರವೇ ಶಾಲಾ ಆವರಣ, ಕೊಠಡಿಗಳನ್ನು ಸ್ವಚ್ಛಗೊಳಿಸಿ ಎಲ್ಲ ರೀತಿಯ ಸಿದ್ಧತೆ ಮಾಡಿಕೊಳ್ಳಲಾಗಿತ್ತು. ಕೆಲವು ಶಾಲೆಗಳನ್ನು ತೋರಣಗಳಿಂದ ಅಲಂಕರಿಸಲಾಗಿತ್ತು. ಬುಧವಾರ ಬೆಳಿಗ್ಗೆ ಮಕ್ಕಳು ಬರುತ್ತಿದ್ದಂತೆಶಾಲೆಗಳ ಕಳೆ ಹೆಚ್ಚಿತ್ತು. ಇಷ್ಟು ದಿನ ಮೌನವಾಗಿದ್ದ ಶಾಲೆಯ ಪರಿಸರದಲ್ಲಿ ಚಿಣ್ಣರ ಕಲರವ ಕೇಳಿ ಬಂತು.

ಕೆಲವು ಮಕ್ಕಳು ನಗು ಮುಖದಿಂದ ಶಾಲೆಯ ಕಡೆಗೆ ಹೆಜ್ಜೆ ಹಾಕಿದರೆ, ಕೆಲವು ಮಕ್ಕಳು ಭಾರದ ಮನಸ್ಸಿನೊಂದಿಗೆ ಶಾಲೆಗೆ ಹೋದರು. ಇನ್ನು ಕೆಲ ಮಕ್ಕಳು ಅಳುತ್ತ, ಅಮ್ಮನಿಗೆ ಟಾಟಾ ಹೇಳುತ್ತ ಪೆಚ್ಚು ಮುಖ ಮಾಡಿಕೊಂಡು ತರಗತಿಯೊಳಗೆ ಹೋದರು.

ಶಾಲೆಯ ಮೊದಲ ದಿನವಾಗಿದ್ದರಿಂದ ಬಹುತೇಕ ಶಾಲೆಗಳಲ್ಲಿ ಹಾಜರಾತಿ ಬೆರಳೆಣಿಕೆಯಷ್ಟಿತ್ತು. ಮೊದಲ ದಿನ ಪರಸ್ಪರ ಪರಿಚಯ, ಅನೌಪಚಾರಿಕ ಮಾತುಗಳಿಗಷ್ಟೇ ತರಗತಿಗಳು ಸೀಮಿತವಾದವು.