ಜೈನಮುನಿ ಹತ್ಯೆ ಪ್ರಕರಣ: 3ನೇ ದಿನವೂ ಮುಂದುವರಿದ ತನಿಖೆ

ಚಿಕ್ಕೋಡಿ: ತಾಲ್ಲೂಕಿನ ಹಿರೇಕೋಡಿ ಗ್ರಾಮದ ನಂದಿ ಪರ್ವತದ ಜೈನಮುನಿ ಕಾಮಕುಮಾರ ನಂದಿ ಮಹಾರಾಜರ ಹತ್ಯೆ ಪ್ರಕರಣದ ತನಿಖೆ ಕೈಗೊಂಡಿರುವ ಅಪರಾಧ ತನಿಖಾ ದಳ ಅಧಿಕಾರಿಗಳು ಬುಧವಾರವೂ ಹಿರೇಕೋಡಿ ನಂದಿ ಪರ್ವತ ಹಾಗೂ ರಾಯಬಾಗ ತಾಲ್ಲೂಕಿನ ಖಟಕಭಾವಿ ಗ್ರಾಮಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಬುಧವಾರ ಸಿಐಡಿ ಮತ್ತು ಐಎಫ್ಸಿಎಲ್ ತಂಡದ ಅಧಿಕಾರಿಗಳು ಜೈನ ಮುನಿ ಹತ್ಯೆಯಾಗಿರುವ ಹಿರೇಕೋಡಿಯ ನಂದಿ ಪರ್ವತಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ತದನಂತರ ಜೈನಮುನಿಯನ್ನು ಹತ್ಯೆಗೈದು ಶವವನ್ನು ತುಂಡರಿಸಿ ಎಸೆಯಲಾಗಿದ್ದ ಖಟಕಬಾವಿಯ ಕೊಳವೆಬಾವಿಯ ಬಳಿ ಪರಿಶೀಲಿಸಿದರು ಎಂದು ಮೂಲಗಳು ತಿಳಿಸಿವೆ.