ಸುಂದರ ತಾಣವಾಗಲಿದೆ ಕಿತ್ತೂರು: ಸತೀಶ ಜಾರಕಿಹೊಳಿ ಭರವಸೆ

ಚನ್ನಮ್ಮನ ಕಿತ್ತೂರು: ‘ಐತಿಹಾಸಿಕ ಕಿತ್ತೂರು ಪಟ್ಟಣವನ್ನು ಸುಂದರ ತಾಣವಾಗಿ ರೂಪಿಸಲು ಇಲ್ಲಿಯ ಶಾಸಕ ಬಾಬಾಸಾಹೇಬ ಪಾಟೀಲ ಅವರಿಗೆ ಎಲ್ಲ ರೀತಿಯ ಸಹಕಾರ ನೀಡಲಾಗುವುದು’ ಎಂದು ಸಚಿವ ಸತೀಶ ಜಾರಕಿಹೊಳಿ ಭರವಸೆ ನೀಡಿದರು.

ಅಂದಾಜು ₹25 ಕೋಟಿ ವೆಚ್ಚದ ವಿವಿಧ ಕಾಮಗಾರಿಗಳಿಗೆ ಇಲ್ಲಿಯ ಕೋಟೆ ಆವರಣ ಎದುರು ಸೋಮವಾರ ಚಾಲನೆ ನೀಡಿ ಅವರು ಮಾತನಾಡಿದರು.

‘ಕಿತ್ತೂರು ವಿಧಾನಸಭೆ ಕ್ಷೇತ್ರದಾದ್ಯಂತ ವೇಗವಾಗಿ ಕೆಲಸಗಳು ನಡೆಯುತ್ತಿವೆ. ಇನ್ನೂ ಮೂರು ವರ್ಷ ಅವಧಿಯಿದೆ. ಇದೇ ವೇಗದಲ್ಲಿ ಕೆಲಸಗಳು ನಡೆದರೆ ಎಲ್ಲ ಕಾಮಗಾರಿಗಳನ್ನು ಮುಗಿಸಲು ಸಾಧ್ಯವಿದೆ’ ಎಂದು ಅಭಿಪ್ರಾಯಪಟ್ಟರು.

ಶಾಸಕ ಬಾಬಾಸಾಹೇಬ ಪಾಟೀಲ, ‘ರಸ್ತೆ ವಿಸ್ತರಣೆಗೆ ಗುರುವಾರ ಪೇಟೆಯ ಜನರು ಸಹಕಾರ ನೀಡಿದಂತೆ ಸೋಮವಾರ ಪೇಟೆಯ ಜನರೂ ನೀಡಿದರೆ ಕಿತ್ತೂರು ಪಟ್ಟಣದ ಅಂದ ಇನ್ನೂ ಹೆಚ್ಚುತ್ತದೆ’ ಎಂದರು.

ಕಲ್ಮಠದ ಮಡಿವಾಳ ರಾಜಯೋಗೀಂದ್ರ ಸ್ವಾಮೀಜಿ, ನಿಚ್ಚಣಕಿ ಪಂಚಾಕ್ಷರಿ ಸ್ವಾಮೀಜಿ, ಪಟ್ಟಣ ಪಂಚಾಯಿತಿ ಅಧ್ಯಕ್ಷ ಜೈಸಿದ್ದರಾಮ ಮಾರಿಹಾಳ, ತಹಶೀಲ್ದಾರ್ ರವೀಂದ್ರ ಹಾದಿಮನಿ, ಮುಖ್ಯಾಧಿಕಾರಿ ಮಲ್ಲಯ್ಯ ಹಿರೇಮಠ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಸಂಗನಗೌಡ ಪಾಟೀಲ, ಮುಖಂಡರಾದ ಶಂಕರ ಹೊಳಿ, ನಾನಾಸಾಹೇಬ ಪಾಟೀಲ, ಆಶ್ಫಾಕ್ ಹವಾಲ್ದಾರ್, ಬಿಷ್ಟಪ್ಪ ಶಿಂಧೆ, ಹನೀಫ್ ಸುತಗಟ್ಟಿ ಇದ್ದರು.