ಹುಕ್ಕೇರಿ: ₹7.14 ಲಕ್ಷ ಮೌಲ್ಯದ ಅಕ್ಕಿ ವಶ

ಹುಕ್ಕೇರಿ: ಪಟ್ಟಣದಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ 210 ಕ್ವಿಂಟಾಲ್ ಅನ್ನಭಾಗ್ಯ ಅಕ್ಕಿ ವಶಪಡಿಸಿಕೊಂಡ ಘಟನೆ ಬುಧವಾರ ಜರುಗಿದೆ.

ಪಟ್ಟಣದ ಹೊರವಲಯದ ತೋಟದ ಮನೆಯಲ್ಲಿ ಅಕ್ರಮವಾಗಿ ಅನ್ನಭಾಗ್ಯ ಅಕ್ಕಿ ಸಂಗ್ರಹಿಸಿಡಲಾಗಿತ್ತು. ಮಾರಾಟ ಮಾಡಲು ಸಾಗಿಸುವಾಗ ಖಚಿತ ಮಾಹಿತಿ ಮೇರೆಗೆ ಆಹಾರ ನಿರೀಕ್ಷಕ ವೀರಭದ್ರ ಶೇಬನ್ನವರ, ಸಿಬ್ಬಂದಿಯಾದ ಇರ್ಫಾನ್ ಉಸ್ತಾದ್, ಲೋಕೇಶ್ ಡಾಂಗೆ ಮತ್ತು ಸ್ಥಳೀಯ ಪೋಲಿಸರು ದಾಳಿ ನಡೆಸಿ ₹7.14 ಲಕ್ಷ ಮೌಲ್ಯದ 420 ಚೀಲಗಳಲ್ಲಿ (ಒಂದೊಂದು ಪ್ಲಾಸ್ಟಿಕ್ ಚೀಲದಲ್ಲಿ 50 ಕೆಜಿಯಂತೆ) 210 ಕ್ವಿಂಟಾಲ್ ಪಡಿತರ ಅಕ್ಕಿ ಹಾಗೂ ₹15 ಲಕ್ಷ ಬೆಲೆ ಬಾಳುವ ಟ್ರಕ್ ವಶಪಡಿಸಿಕೊಂಡಿದ್ದಾರೆ.

ಟ್ರಕ್ ಚಾಲಕ ರಾಯಬಾಗ ತಾಲ್ಲೂಕಿನ ನಿಪನಾಳ ಗ್ರಾಮದ ಸಂತೋಷ ಶಿವಾಜಿ ಕುರಣಿ ಹಾಗೂ ಸ್ಥಳೀಯ ವ್ಯಾಪಾರಿ ರವಿ ಅವರ ಮೇಲೆ ದೂರು ದಾಖಲಾಗಿದೆ.

ಎ.ಎಸ್.ಐ. ಕೆ.ಐ.ಗಣಾಚಾರಿ ಅವರು ಕಲಂ 7 ಅಗತ್ಯ ವಸ್ತುಗಳ ಕಾಯ್ದೆ 1955 ಹಾಗು ಕರ್ನಾಟಕ ಅವಶ್ಯ ವಸ್ತುಗಳ ನಿಯಂತ್ರಣ ಆದೇಶ 1992 ಅನುಬಂಧ 18 (ಎ) (ಬಿ) (ಸಿ) ಅಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.