World Environment Day: ವಸತಿನಿಲಯಕ್ಕೆ ಹಸಿರು ತೋರಣ

ಚಿಕ್ಕೋಡಿ: ತಾಲ್ಲೂಕಿನ ಕಬ್ಬೂರು ಪಟ್ಟಣದಲ್ಲಿರುವ ಸಮಾಜ ಕಲ್ಯಾಣ ಇಲಾಖೆಯ ಡಾ.ಬಿ.ಆರ್. ಅಂಬೇಡ್ಕರ್ ಸರ್ಕಾರಿ ಮೆಟ್ರಿಕ್ ಪೂರ್ವ ಬಾಲಕರ ವಸತಿ ನಿಲಯ ಹಸಿರು ಹೊದ್ದು ಕಂಗೊಳಿಸುತ್ತಿದೆ. ಒಂದೂವರೆ ಎಕರೆಯಲ್ಲಿರುವ ವಸತಿ ನಿಲಯ ಮೇಲ್ವಿಚಾರಕ ನಾಗೇಶ ಕಾಪಶಿ ಅವರ ಆಸಕ್ತಿಯ ಕಾರಣ ಸುಂದರ ವನವಾಗಿದೆ.

ಬಂಜರು ಭೂಮಿಯಾಗಿದ್ದ 1 ಎಕರೆ ಪ್ರದೇಶದಲ್ಲಿ ಅರಣ್ಯ ಇಲಾಖೆಯ ಸಹಕಾರದಿಂದ ಚಿಕ್ಕು, ತೇಗ, ತೆಂಗು, ಹುಣಸೆ ಮುಂತಾದ ಮರ– ಗಿಡಗಳನ್ನು ಬೆಳೆಸಲಾಗಿದೆ. 135 ಪೇರಲ ಗಿಡಗಳು, 6 ಪಪ್ಪಾಯ, 6 ಲಿಂಬೆ, 30 ತೇಗದ ಮರ, 15 ತೆಂಗಿನ ಮರ, 8 ಹುಣಸೆ ಮರ, 20 ಚಿಕ್ಕು ಹಣ್ಣಿನ ಗಿಡಗಳನ್ನು ಬೆಳಸಲಾಗಿದೆ. ಪಕ್ಷಿಗಳು ಇಲ್ಲಿಗೆ ಲಗ್ಗೆ ಇಡುತ್ತವೆ. ಇವುಗಳ ಕಲರವ ಕೇಳುವುದೇ ಮನಸ್ಸಿಗೆ ಆನಂದ ನೀಡುತ್ತದೆ. ಪಕ್ಷಿಗಳಿಗಾಗಿ ನೀರು ಮತ್ತು ಆಹಾರ ಇರಿಸುವ ವ್ಯವಸ್ಥೆ ಮಾಡಲಾಗಿದೆ.

ಕೊಳವೆಬಾವಿಯಿಂದ ಪೈಪ್‌ಲೈನ್ ಮಾಡಲಾಗಿದೆ. ನೀರು ಸರಬರಾಕು, ಕಳೆ ತೆಗೆಯುವುದು, ಪಾತಿ ಮಾಡುವುದನ್ನೂ ವಿದ್ಯಾರ್ಥಿಗಳು ಸಂಭ್ರಮಿಸುತ್ತಿದ್ದಾರೆ.

ಅಡುಗೆಗೆ ತರಕಾರಿ: 20 ಗುಂಟೆಯಲ್ಲಿ ವಿಶೇಷ ಉದ್ಯಾನ ನಿರ್ಮಿಸಲಾಗಿದ್ದು, ಇಲ್ಲಿ ವಿವಿಧ ಫ್ಯಾಷನ್ ಗಿಡಗಳು, ಹೂವಿನ ಗಿಡಗಳು ಮನ ಸೆಳೆಯುವಂತಿವೆ. ಬದನೆ, ಟೊಮೆಟೊ, ಮೂಲಂಗಿ, ಕೊತ್ತಂಬರಿ ಮುಂತಾದ ತರಕಾರಿಗಳನ್ನು ಬೆಳೆಯಲಾಗುತ್ತಿದೆ. ಇವುಗಳನ್ನೇ ಅಡುಗೆಗೂ ಬಳಸಲಾಗುತ್ತದೆ. ಹಣ್ಣುಗಳನ್ನೂ ವಿದ್ಯಾರ್ಥಿಗಳಿಗೇ ನೀಡುತ್ತಿವುದು ವಿಶೇಷ.