ಸೈಟ್‌ ಕೊಡಿಸುವುದಾಗಿ ವಂಚನೆ– ಆರೋಪ: ಜಿ.ಪಂ ಅಧ್ಯಕ್ಷೆಯ ಪತಿ ಪ್ರಶಾಂತ ಬಂಧನ

ಬೆಳಗಾವಿ: ಸೈಟ್‌ ಕೊಡಿಸುವುದಾಗಿ ₹ 2 ಲಕ್ಷ ಪಡೆದು ವಂಚಿಸಿದ ಆರೋಪದ ಮೇಲೆ ಜಿಲ್ಲಾ ಪಂಚಾಯ್ತಿ ಅಧ್ಯಕ್ಷೆ ಆಶಾ ಐಹೊಳೆ ಪತಿ ಪ್ರಶಾಂತ ಐಹೊಳೆ ಅವರನ್ನು ಅಥಣಿ ಪೊಲೀಸರು ಶುಕ್ರವಾರ ಬಂಧಿಸಿದ್ದಾರೆ.

‘ಮಹಾಲಕ್ಷ್ಮಿ ಎಸ್ಟೇಟ್ಸ್‌ ಕಂಪೆನಿ ನಡೆಸುತ್ತಿದ್ದಪ್ರಶಾಂತ ಐಹೊಳೆ ಅವರಿಗೆ ಅಥಣಿಯಲ್ಲಿ ಸೈಟ್‌ ಕೊಡಿಸುವಂತೆ ₹ 2 ಲಕ್ಷ ಹಣ ನೀಡಿದ್ದೆ. ಆದರೆ, ಸೈಟ್‌ ನೀಡದೆ ವಂಚಿಸಿದ್ದಾರೆ’ ಎಂದು ಸಂಜಯ ಸಂಕಪಲ್ಕರ್‌ ದೂರು ನೀಡಿದ್ದರು.

‘ಸಂಜಯ ಅವರ ದೂರಿನ ಮೇರೆಗೆ ಸೂಕ್ತ ಪ್ರಶಾಂತ ಅವರನ್ನು ಬಂಧಿಸಿ, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದೇವೆ’ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಸುಧೀರಕುಮಾರ್‌ ರೆಡ್ಡಿ ತಿಳಿಸಿದರು.