ಮತಾಂತರ ಆರೋಪ: ಹೆಬ್ರನ್ ಚರ್ಚ್ ಪಾದ್ರಿ ವಿಕ್ಟರ್ ಬಂಧನ

ಬೆಂಗಳೂರು: ಬೇಸಿಗೆ ಶಿಬಿರದ ನೆಪದಲ್ಲಿ ಮಕ್ಕಳನ್ನು ಕರೆದುಕೊಂಡು ಹೋಗಿ ಕ್ರೈಸ್ತ ಧರ್ಮಕ್ಕೆ ಮತಾಂತರ ಮಾಡಿಸುತ್ತಿದ್ದ ಆರೋಪದ ಮೇಲೆ ಮಾರತ್ತಹಳ್ಳಿಯಲ್ಲಿರುವ ಹೆಬ್ರನ್ ಚರ್ಚ್‌ನ ಸಹಾಯಕ ಪಾದ್ರಿ ವಿಕ್ಟರ್ ಬಾಬು ಅವರನ್ನು ಮಹದೇವಪುರ ಠಾಣೆ ಪೊಲೀಸರು ಗುರುವಾರ ಬಂಧಿಸಿದ್ದಾರೆ.

ಈ ಸಂಬಂಧ ಬುಧವಾರ ರಾಜಶೇಖರ ರೆಡ್ಡಿ ಎಂಬುವರು ದೂರು ನೀಡಿದ್ದರು. ಬೇಸಿಗೆ ಶಿಬಿರ ನಡೆಸುವುದಾಗಿ ಕಳೆದ ಮೂರು ದಿನಗಳಿಂದ 23 ಮಕ್ಕಳನ್ನು ಚರ್ಚ್‌ಗೆ ಕರೆದುಕೊಂಡು ಹೋಗಿ ಹಾಡು, ಪ್ರಾರ್ಥನೆ ಸೇರಿದಂತೆ ಧಾರ್ಮಿಕ ವಿಷಯಗಳ ಬೋಧನೆ ಮಾಡಿದ್ದಾರೆ ಎಂದು ದೂರುದಾರರು ತಿಳಿಸಿದ್ದಾರೆ.
 
ವಿಕ್ಟರ್ ಬಾಬು ಅವರು, ಪೋಷಕರ ಅನುಮತಿ ಇಲ್ಲದೇ ಮಕ್ಕಳನ್ನು ಕರೆದುಕೊಂಡು ಹೋಗಿದ್ದಾರೆ. ಬೇಸಿಗೆ ಶಿಬಿರ ನಡೆಸುತ್ತಿರುವ ಬಗ್ಗೆ ವಿಕ್ಟರ್ ಬಳಿ ಯಾವ ದಾಖಲೆಗಳು ಇರಲಿಲ್ಲ. ಮಕ್ಕಳು ಮನೆಯಲ್ಲಿ ಹಾಡು, ಪ್ರಾರ್ಥನೆ ಮಾಡುತ್ತಿದ್ದ ವೇಳೆ ಪೋಷಕರು ಅವರನ್ನು ವಿಚಾರಿಸಿದಾಗ ಪ್ರಕರಣ ಗೊತ್ತಾಗಿದೆ.