ಸಾರಿಗೆ ನಿಗಮಗಳಿಗೆ ತೀವ್ರ ಸಂಕಷ್ಟ

ಬೆಂಗಳೂರು: ಡೀಸೆಲ್‌ ಬೆಲೆಯಲ್ಲಿ ದಿಢೀರ್‌ ಏರಿಕೆಯಾದ ಪರಿಣಾಮ ರಾಜ್ಯದ ನಾಲ್ಕು ಸಾರಿಗೆ ನಿಗಮಗಳು ಸಂಕಷ್ಟ ಎದುರಿಸುತ್ತಿವೆ. ನಿಗಮಗಳಿಗೆ ಪ್ರತಿ ತಿಂಗಳು ₹ 10 ಕೋಟಿ ನಷ್ಟವಾಗುತ್ತಿದೆ. ಒಂದೋ ನಷ್ಟದಲ್ಲಿ ನಿಗಮವನ್ನು ನಿರ್ವಹಿಸಬೇಕು ಅಥವಾ ಪ್ರಯಾಣ ದರವನ್ನು ಏರಿಕೆ ಮಾಡಬೇಕಾದ ಸ್ಥಿತಿ ಒದಗಿದೆ.

ಕೆಎಸ್‌ಆರ್‌ಟಿಸಿ ಇತ್ತೀಚೆಗಷ್ಟೇ ಕಳೆದ ವರ್ಷದ ಆದ ₹ 177 ಕೋಟಿ ನಷ್ಟದಿಂದ ಹೊರಬಂದಿತ್ತು. ಮಾತ್ರವಲ್ಲ ಈ ವರ್ಷದ ಆರಂಭದಲ್ಲಿ ₹ 10 ಕೋಟಿಯಷ್ಟು ಲಾಭ ದಾಖಲಿಸಿತ್ತು. ಸಂಸ್ಥೆಯು ಸಗಟು ದರದಲ್ಲಿ ಡೀಸೆಲ್‌ ಕೊಳ್ಳುತ್ತಿದೆ. ಇದರಿಂದಾಗಿ ಪ್ರತಿ ಲೀಟರ್‌ಗೆ ₹ 2ರಷ್ಟು ರಿಯಾಯಿತಿ ಅಥವಾ ಹೆಚ್ಚು ಪ್ರಮಾಣದ ಡೀಸೆಲ್‌ ಪಡೆಯಬಹುದಿತ್ತು.

ಏಕಪ್ರಕಾರವಾಗಿ ಇಂಧನ ದರ ಏರಿಕೆಯಿಂದಾಗುವ ಆರ್ಥಿಕ ಪರಿಣಾಮಗಳನ್ನು ಸಂಸ್ಥೆಯ ಅಧಿಕಾರಿಗಳು ಅಧ್ಯಯನ ಮಾಡುತ್ತಿದ್ದಾರೆ.

‘ಮೇ 14ರವರೆಗೆ ಪ್ರತಿ ಲೀಟರ್‌ ಡೀಸೆಲ್‌ಗೆ ₹ 63.03 ದರ ಇದ್ದದ್ದು ₹ 63.07ಕ್ಕೆ ಏರಿತು. ಇದರಿಂದ ಮಾಸಿಕ ₹ 7 ಲಕ್ಷದಷ್ಟು ಹೆಚ್ಚುವರಿ ವೆಚ್ಚದ ಹೊರೆ ಬಿತ್ತು. ಅದಾದ ಎರಡು ದಿನಗಳಲ್ಲೇ ಪ್ರತಿ ಲೀಟರ್‌ ಇಂಧನ ದರ ₹ 65.08ಕ್ಕೆ ಏರಿತು. ವೆಚ್ಚ ₹ 3.68 ಕೋಟಿಗೆ ಏರಿತು’ ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದರು.

‘ಇಂಧನ ದರ ಇದೇ ರೀತಿ ಏರುತ್ತಾ ಹೋದರೆ ಪರಿಸ್ಥಿತಿ ಉತ್ತಮವಾಗಿರುವುದಿಲ್ಲ. ಪ್ರತಿ ಲೀಟರ್‌ ಡೀಸೆಲ್‌ ದರ ₹ 60ರ ಕೆಳಗಿಳಿದರೂ ಆದಾಯ ಮತ್ತು ವೆಚ್ಚದಲ್ಲಿ ಸಮತೋಲನ ಸಾಧಿಸಲು ಕೆಲಕಾಲ ತಗಲುತ್ತದೆ’ ಎಂದು ಅಧಿಕಾರಿ ಹೇಳಿದರು.

ದರ ಏರಿಕೆ ಪರಿಣಾಮ ಬಿಎಂಟಿಸಿಯ ಸ್ಥಿತಿಯನ್ನೂ ಹದಗೆಡಿಸಿದೆ. ಇದುವರೆಗೆ ₹ 292 ಕೋಟಿ ನಷ್ಟವನ್ನು ಸರಿದೂಗಿಸಲು ಪ್ರಯತ್ನ ನಡೆಯುತ್ತಿರುವಾಗಲೇ ಡೀಸೆಲ್‌ ದರ ಏರಿದೆ. ಇದರಿಂದಾಗಿ ಮಾಸಿಕ ವೆಚ್ಚ ₹ 1.96 ಕೋಟಿಯಷ್ಟು ಏರಿಕೆಯಾಗಿದೆ.

ಈಶಾನ್ಯ ಮತ್ತು ವಾಯವ್ಯ ಕರ್ನಾಟಕ ಸಾರಿಗೆ ನಿಗಮಗಳ ಪರಿಸ್ಥಿತಿಯೂ ಭಿನ್ನವಾಗಿಲ್ಲ. ಎರಡೂ ಸಂಸ್ಥೆಗಳು ಡೀಸೆಲ್‌ಗಾಗಿ ₹ 3.65 ಕೋಟಿ ಹೆಚ್ಚುವರಿಯಾಗಿ ವಿನಿಯೋಗಿಸಬೇಕಿದೆ. 

ದರ ಏರಿಕೆ ಹೊಸ ಸರ್ಕಾರದ ನಿರ್ಧಾರ

ಕಳೆದ ವರ್ಷಾಂತ್ಯದಲ್ಲಿ ಪ್ರಯಾಣ ದರ ಏರಿಸಲು ಸರ್ಕಾರದ ಅನುಮತಿ ಕೇಳಿದ್ದೆವು. ಆದರೆ, ಸಾರ್ವಜನಿಕರ ಆಕ್ರೋಶ ಎದುರಿಸುವ ಭೀತಿಯಿಂದಾಗಿ ಸರ್ಕಾರ ಈ ಪ್ರಸ್ತಾವ ತಿರಸ್ಕರಿಸಿತ್ತು.

ಕೇಂದ್ರ ಸರ್ಕಾರ ಇಂಧನ ದರ ಇಳಿಸದಿದ್ದರೆ ಹೊಸ ಸರ್ಕಾರ ಮುಂದಿನ ದಿನಗಳಲ್ಲಿ ತೀವ್ರ ಬಿಕ್ಕಟ್ಟು ಎದುರಿಸಬೇಕಾಗುತ್ತದೆ. ಒಂದೋ ಪ್ರಯಾಣ ದರ ಏರಿಸಲು ನಿರ್ಧರಿಸಬೇಕು. ಅಥವಾ ಪರಿಸ್ಥಿತಿ ಸರಿತೂಗಿಸಲು ಅನುದಾನ ಬಿಡುಗಡೆ ಮಾಡಬೇಕು ಎಂದು ನಿಗಮದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.