ಹೆಚ್ಚುತ್ತಿರುವ ಭ್ರೂಣ ಹತ್ಯೆ: ತಾರಾ ಆತಂಕ

ಯಲಹಂಕ: ಭಾರತದಲ್ಲಿ ಭ್ರೂಣಹತ್ಯೆ ಸಮಸ್ಯೆ ಹೆಚ್ಚಾಗಿ ಕಂಡು ಬರುತ್ತಿದ್ದು ಆತಂಕಕಾರಿ ಬೆಳವಣಿಗೆಯಾಗಿದೆ ಎಂದು ವಿಧಾನ ಪರಿಷತ್‌ ಸದಸ್ಯೆ ತಾರಾ ಅನೂರಾಧ ಹೇಳಿದರು.

ಕಿತ್ತೂರು ರಾಣಿ ಚೆನ್ನಮ್ಮ ಮಹಿಳಾ ಸಂಘದ ಆಶ್ರಯದಲ್ಲಿ ಕಾಚರಕನಹಳ್ಳಿ ಕೋದಂಡರಾಮಸ್ವಾಮಿ ದೇವಸ್ಥಾನದ ಆವರಣದಲ್ಲಿ ಅಂತರರಾಷ್ಟ್ರೀಯ ಮಹಿಳಾ ದಿನಾಚರಣೆ ಅಂಗವಾಗಿ ಆಯೋಜಿಸಿದ್ದ ಬೆಂಗಳೂರು ನಗರ ಜಿಲ್ಲಾಮಟ್ಟದ ಮಹಿಳಾ ಸಾಂಸ್ಕೃತಿಕ ಉತ್ಸವ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು.

‘ಭ್ರೂಣಹತ್ಯೆ ತಡೆಗೆ ಸರ್ಕಾರ ಹಾಗೂ ಸ್ವಯಂಸೇವಾ ಸಂಸ್ಥೆಗಳು ಒಟ್ಟಾಗಿ ಪ್ರಯತ್ನ ನಡೆಸಬೇಕಿದೆ’ ಎಂದು ಅಭಿಪ್ರಾಯಪಟ್ಟರು.

ಗೃಹ ಸಚಿವ ಕೆ.ಜೆ.ಜಾರ್ಜ್‌ ಮಾತ­ನಾಡಿ, ಮಹಿಳೆಯರ ಸಬಲೀಕರಣದತ್ತ ದೃಢ­ವಾದ ಹೆಜ್ಜೆ ಇಡಲಾಗಿದ್ದು, ಈ ಆಂದೋಲನ ಇನ್ನೂ ಹೆಚ್ಚಬೇಕಿದೆ ಎಂದು ಹೇಳಿದರು.

ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿರುವ ಮಹಿಳೆಯರಿಗೆ ಕಿತ್ತೂರು ರಾಣಿ ಚೆನ್ನಮ್ಮ ಸದ್ಭಾವನಾ ಪ್ರಶಸ್ತಿ ನೀಡಿ ಗೌರ ವಿಸಲಾಯಿತು. ಸುಜಾ ಜಾರ್ಜ್‌, ತಬು ದಿನೇಶ್‌ ಗುಂಡೂರಾವ್‌, ದಂಡು ಪ್ರದೇಶ ಕನ್ನಡ ಸಂಘಟನೆಗಳ ಒಕ್ಕೂಟದ ಅಧ್ಯಕ್ಷ ಕೆ.ಸಿ. ಜಗನ್ನಾಥರೆಡ್ಡಿ, ರಂಗ­ಕರ್ಮಿ ಕೆ.ವಿ. ನಾಗರಾಜಮೂರ್ತಿ, ಸಂಘದ ಅಧ್ಯಕ್ಷೆ ಸಲ್ಮಾ ತಾಜ್‌ ಇದ್ದರು.

ಇದಕ್ಕೂ ಮುನ್ನ ಲಿಂಗರಾಜಪುರದ ರಾಜ್‌ಕುಮಾರ್‌ ಪ್ರತಿಮೆಯಿಂದ ಕಾರ್ಯ­­ಕ್ರಮದ ಸ್ಥಳಕ್ಕೆ ನಡೆದ ವಿವಿಧ ಮಹಿಳಾ ಜಾನಪದ ಕಲಾತಂಡಗಳ ಮೆರವಣಿ­ಗೆ ಎಲ್ಲರ ಗಮನ ಸೆಳೆಯಿತು.