‘ಜಿ.ಎಸ್.ಶಿವರುದ್ರಪ್ಪ ನುಡಿದಂತೆ ನಡೆದವರು’

ಬೆಂಗಳೂರು: ‘ಜಿಎಸ್ಎಸ್‌ ಅವರ ನಡೆ ಅಥವಾ ನುಡಿಯಲ್ಲಿ ಎಂದಿಗೂ ಕೃತ್ರಿ­ಮತೆ ಇರಲಿಲ್ಲ. ಅವರು ನುಡಿದಂತೆ ನಡೆ­ದ­ವರು’ ಎಂದು ಕವಿ ಸಿದ್ದಲಿಂಗಯ್ಯ ಹೇಳಿದರು.

ಜಯನಗರದ ವಿಜಯ ಕಾಲೇಜಿನಲ್ಲಿ ಶುಕ್ರವಾರ ನಡೆದ ‘ದೀಪಧಾರಿ’ ಡಾ.ಜಿಎಸ್‌ಎಸ್‌ ಅವರ ಸಾಹಿತ್ಯವನ್ನು ಕುರಿತ ರಾಜ್ಯಮಟ್ಟದ ವಿಚಾರಸಂಕಿ­ರ­ಣದ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

‘ಜಿಎಸ್‌ಎಸ್‌ ಅವರು ಮಹಾ ಸ್ವಾಭಿ­ಮಾನಿ. ಕುವೆಂಪು ಅವರಂತೆ ವೈಚಾರಿಕ ಮನೋಭಾವದವರು. ಅವರು ಬಂಡಾಯ ಮತ್ತು ದಲಿತ ಸಾಹಿತ್ಯಕ್ಕೆ ಬೆಂಬಲ ನೀಡಿದವರು. ಅನ್ಯಾಯವನ್ನು ಯುವಕರು ವಿರೋಧಿಸಬೇಕು ಎಂದು ಹೇಳುತ್ತಿದ್ದರು. ಪ್ರತಿಭಟನೆ, ಚಳವಳಿ­ಯಲ್ಲಿ ಪಾಲ್ಗೊಂಡ ವಿದ್ಯಾರ್ಥಿಗಳ ಬೆನ್ನು ತಟ್ಟಿದವರು’ ಎಂದು ನೆನಪಿಸಿ­ಕೊಂಡರು.

ಬೆಂಗಳೂರು ವಿವಿ ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕ ಹೊನ್ನು ಸಿದ್ದಾರ್ಥ ಮಾತನಾಡಿ, ‘ಜಿಎಸ್‌ಎಸ್‌ ಸಾಂಸ್ಕೃತಿಕ, ಸಾಮಾಜಿಕ ಹಾಗೂ ವೈಚಾರಿಕ ಈ ಮೂರು ಗುಣಗಳ ಸಂಗಮವಾ­ಗಿ­ದ್ದವರು. ಅವರು ಪ್ರತಿಭೆಗೆ, ಪ್ರಬುದ್ಧತೆಗೆ ಆದ್ಯತೆ ನೀಡಿದ್ದವರು’ ಎಂದರು.
‘ಕೆಲವು ಸ್ವಯಂಘೋಷಿತ ವಿಮರ್ಶಕರು ಹಾಗೂ ವಿದ್ವಾಂಸರೆನಿಸಿ ಕೊಂಡವರು ಕನ್ನಡ ಅಧ್ಯಯನ ಕೇಂದ್ರದ ಕುರಿತು ಇಲ್ಲ ಸಲ್ಲದ ಟೀಕೆ ಮಾಡುತ್ತಾರೆ. ಆದರೆ, ಕನ್ನಡ ಅಧ್ಯಯನ ಕೇಂದ್ರದಲ್ಲಿ ನಡೆಯುತ್ತಿರುವ ಚಟವಟಿಕೆಗಳನ್ನು ಪರಾಮರ್ಶಿಸಲಿ. ವೃಥಾ ಟೀಕೆ ಮಾಡುವುದು ಸರಿಯಲ್ಲ’ ಎಂದು ಹೇಳಿದರು.

ವಿಜಯ ಕಾಲೇಜಿನ ಡೀನ್‌ ಪ್ರೊ.ಆರ್‌.­ವಿ.ಪ್ರಭಾಕರ ಅವರು, ‘ಇಂದಿನ ವಿದ್ಯಾರ್ಥಿಗಳು ಮತ್ತು ಅಧ್ಯಾ­ಪಕರು ಜಿಎಸ್‌ಎಸ್‌ ಅವರಿಂದ ಮತ್ತು ಅವರ ಸಾಹಿತ್ಯದಿಂದ ಕಲಿಯಬೇಕು. ಅವರ ಜೀವನಶೈಲಿ, ಪ್ರತಿಭೆ ಎಲ್ಲರಿಗೂ ಮಾದರಿಯಾಗಬೇಕು’ ಎಂದರು.