ನಾಯಿ ಬಾಲಕ್ಕೆ ಪಟಾಕಿ; ಹರಿದಾಡಿದ ವಿಡಿಯೊ

ಬೆಂಗಳೂರು: ಯುವಕರ ಗುಂಪೊಂದು ನಾಯಿ ಬಾಲಕ್ಕೆ ಪಟಾಕಿ ಕಟ್ಟಿದ್ದ ಘಟನೆ ನಗರದಲ್ಲಿ ನಡೆದಿದೆ ಎನ್ನಲಾಗಿದ್ದು, ಅದರ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಮಂಗಳವಾರ ಹರಿದಾಡಿತು.

ನಾಯಿಯೊಂದರ ಬಾಲಕ್ಕೆ ಪಟಾಕಿ ಸರ ಕಟ್ಟಿದ್ದ ಯುವಕರಿಬ್ಬರು, ಆ ಸರಕ್ಕೆ ಬೆಂಕಿ ಹಚ್ಚಿದ್ದರು. ಪಟಾಕಿ ಸಿಡಿಯುತ್ತಲೇ ಹೆದರಿದ ನಾಯಿ ಕೂಗಾಡುತ್ತಲೇ ರಸ್ತೆಯಲ್ಲೆಲ್ಲ ಓಡಾಡಿದೆ. ಈ ದೃಶ್ಯ ವಿಡಿಯೊದಲ್ಲಿದೆ.

ವಿಡಿಯೊವನ್ನು ಶೇರ್ ಮಾಡಿರುವ ಹಲವರು, ಅಮಾನವೀಯವಾಗಿ ನಡೆದುಕೊಂಡಿರುವ ಯುವಕರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.

ಪೊಲೀಸ್ ಅಧಿಕಾರಿಯೊಬ್ಬರು, ‘ವಿಡಿಯೊ ಪರಿಶೀಲಿಸಲಾಗುತ್ತಿದೆ. ಘಟನೆ ನಡೆದಿರುವ ಸ್ಥಳ ಯಾವುದು ಎಂಬುದು ಸದ್ಯಕ್ಕೆ ಗೊತ್ತಾಗಿಲ್ಲ’ ಎಂದು ಹೇಳಿದರು.