ಮಕ್ಕಳನ್ನು ಮೂಡಲಪಾಯಕ್ಕೆ ಕರೆತನ್ನಿ: ತಲ್ಲೂರು ಶಿವರಾಮ ಶೆಟ್ಟಿ

ಬೆಂಗಳೂರು: ‘ಮೂಡಲಪಾಯ ಯಕ್ಷಗಾನ ಪ್ರಕಾರ ಬೆಳವಣಿಗೆ ಹೊಂದಲು ಶಾಲಾ ಹಂತದಲ್ಲಿಯೇ ಮಕ್ಕಳಿಗೆ ಈ ಕಲೆಯ ಬಗ್ಗೆ ಆಸಕ್ತಿ ಮೂಡಿಸಿ, ತರಬೇತಿ ಒದಗಿಸಬೇಕು’ ಎಂದು ಕರ್ನಾಟಕ ಯಕ್ಷಗಾನ ಅಕಾಡೆಮಿ ಅಧ್ಯಕ್ಷ ತಲ್ಲೂರು ಶಿವರಾಮ ಶೆಟ್ಟಿ ಅಭಿಪ್ರಾಯಪಟ್ಟರು. 

ಕರ್ನಾಟಕ ಯಕ್ಷಗಾನ ಅಕಾಡೆಮಿಯು ನಗರದಲ್ಲಿ ಹಮ್ಮಿಕೊಂಡಿರುವ ಎರಡು ದಿನಗಳ ‘ಮೂಡಲಪಾಯ ಯಕ್ಷೋತ್ಸವ’ಕ್ಕೆ ಮಂಗಳವಾರ ಚಾಲನೆ ದೊರೆಯಿತು.

ಈ ವೇಳೆ ಮಾತನಾಡಿದ ಶಿವರಾಮ ಶೆಟ್ಟಿ, ‘ಮೂಡಲಪಾಯ ಕಲಾ ಪ್ರಕಾರದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ಹಿರಿಯ ಕಲಾವಿದರಿದ್ದಾರೆ. ಆದರೆ, ಹೊಸಬರು ಅಷ್ಟಾಗಿ ಬರುತ್ತಿಲ್ಲ. ಕರಾವಳಿ ಭಾಗದಲ್ಲಿ ಜನಪ್ರಿಯವಾಗಿರುವ ಯಕ್ಷಗಾನ ಕಲಾ ಪ್ರಕಾರಕ್ಕೆ ಮಕ್ಕಳೂ ಹೆಚ್ಚಿನ ಸಂಖ್ಯೆಯಲ್ಲಿ ಬರುತ್ತಿದ್ದಾರೆ. ಜನಪ್ರತಿನಿಧಿಗಳು ಕೂಡ ಪ್ರೋತ್ಸಾಹ ನೀಡುತ್ತಿದ್ದಾರೆ. ಉಡುಪಿ ಜಿಲ್ಲೆಯೊಂದರಲ್ಲಿಯೇ 90 ಶಾಲೆಗಳಲ್ಲಿ ಯಕ್ಷಗಾನ ಕಲಿಸಲಾಗುತ್ತಿದೆ. ಇದರಿಂದ ಯಕ್ಷಗಾನ ಬೆಳವಣಿಗೆ ಹೊಂದುತ್ತಿದೆ. ಮೂಡಲಪಾಯದ ಹಿರಿಯ ಕಲಾವಿದರು ಮಕ್ಕಳಿಗೆ ಕಲೆಯ ಬಗ್ಗೆ ತರಬೇತಿ ಒದಗಿಸಬೇಕು’ ಎಂದರು.    

‘ಮೂಡಲಪಾಯದ ಕಲಾವಿದರನ್ನು ಗುರುತಿಸಲು ಸಮ್ಮೇಳನ ನಡೆಸಬೇಕಾದ ಅಗತ್ಯವಿದೆ. ಸ್ಥಳೀಯ ಶಾಸಕರು, ದಾನಿಗಳು ಕೂಡ ಈ ಕಲಾ ಪ್ರಕಾರವನ್ನು ಪ್ರೋತ್ಸಾಹಿಸಬೇಕು. ಮಕ್ಕಳಿಗೆ ಮೂಡಲಪಾಯದಲ್ಲಿ ಆಸಕ್ತಿ ಮೂಡಿಸಿದರೆ ಕರಾವಳಿ ಭಾಗದ ಯಕ್ಷಗಾನದಷ್ಟೇ ಈ ಕಲೆಯೂ ಜನಪ್ರಿಯವಾಗುತ್ತದೆ. ದೈವ ಕಲೆಯಾಗಿ ಯಕ್ಷಗಾನ ಸ್ವೀಕರಿಸಲ್ಪಟ್ಟ ಪರಿಣಾಮ, ಕೆಲ ಮೇಳಗಳಿಗೆ 10–20 ವರ್ಷಗಳು ಪ್ರದರ್ಶನ ಮುಂಚಿವಾಗಿ ಕಾಯ್ದಿರಿಸಲ್ಪಟ್ಟಿವೆ’ ಎಂದು ಹೇಳಿದರು. 

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಿರ್ದೇಶಕಿ ಗಾಯಿತ್ರಿ ಕೆ.ಎಂ., ‘ಮೂಡಲಪಾಯ ಯಕ್ಷಗಾನ ಉಳಿಸಿ ಬೆಳೆಸುವ ನಿಟ್ಟಿನ‌ಲ್ಲಿ ಚ‌ರ್ಚೆಗಳು ನಡೆಯಬೇಕು. ಯಕ್ಷಗಾನ ಎಂದರೆ ಕರಾವಳಿ ಪ್ರದೇಶ ಎಂಬ ಭಾವನೆ ಇದೆ. ಬಯಲುಸೀಮೆಯ ಕಲೆಯಾಗಿರುವ ಮೂಡಲಪಾಯವನ್ನು ಗ್ರಾಮ ದೇವತೆಗಳ ಹಬ್ಬದ‌ಲ್ಲಿ ಕಾಣಬಹುದು. ಇದು ಹವ್ಯಾಸಿ ಕಲೆಯಾಗಿದ್ದು, ತಿರುಗಾಟ ಇಲ್ಲದಿರುವುದರಿಂದ ಕೆಲ ಪ್ರದೇಶಕ್ಕೆ ಸೀಮಿತಗೊಂಡಿದೆ. ವಿವಿಧ ಜಿಲ್ಲೆಗಳ‌ಲ್ಲಿ ಮೂಡಲಪಾಯವನ್ನು ಗಟ್ಟಿಗೊಳಿಸುವ ಕಾರ್ಯ ನಡೆಯುತ್ತಿದೆ’ ಎಂದರು. 

ಯಕ್ಷಗಾನ ಕಲಾವಿದ ಹಾಗೂ ವಿದ್ವಾಂಸ ಶ್ರೀನಿವಾಸ ಸಾಸ್ತಾನ, ‘25 ವರ್ಷಗಳ ಹಿಂದೆ ಬೆಂಗಳೂರಿನಲ್ಲಿ ಕರಾವಳಿಯ ಯಕ್ಷಗಾನ ಹಾಗೂ ಮೂಡಲಪಾಯ ಯಕ್ಷಗಾನದ ಜುಗಲ್ ಬಂದಿ ನಡೆಸಲಾಗಿತ್ತು. ಈ ಎರಡೂ ಪ್ರಕಾರಗಳಲ್ಲಿ ಸಾಮ್ಯತೆಯಿದೆ’ ಎಂದರು. 

ಇದಕ್ಕೆ ‍ಪೂರಕವಾಗಿ ಮಾತನಾಡಿದ ಅಕಾಡೆಮಿ ಸದಸ್ಯ ವಿದ್ಯಾಧರ ಜಲವಳ್ಳಿ, ‘ಕರಾವಳಿಯ ಯಕ್ಷಗಾನ ಹಾಗೂ ಮೂಡಲಪಾಯ ಯಕ್ಷಗಾನದ ಜುಗಲ್ ಬಂದಿಯನ್ನು ಉಡುಪಿ ಅಥವಾ ಬೆಂಗಳೂರಿನಲ್ಲಿ ಈಗ ಮತ್ತೆ ನಡೆಸಬೇಕು’ ಎಂದು ಅಕಾಡೆಮಿ ಅಧ್ಯಕ್ಷರಿಗೆ ಮನವಿ ಮಾಡಿದರು. 

ಬಳಿಕ ಮೂಡಲಪಾಯ ತಾಳಮೇಳ, ವಿಚಾರಸಂಕಿರಣ ಹಾಗೂ ಬೊಂಬೆಯಾಟ ನಡೆಯಿತು.