‘ನವ ಮೈಸೂರು ನಿರ್ಮಾಣಕ್ಕೆ ಚಿಂತನೆ’

ಬೆಂಗಳೂರು: ‘ಮೈಸೂರು ಸುತ್ತಮುತ್ತಲಿನ ಪ್ರದೇಶಗಳನ್ನು ನಗರ ವ್ಯಾಪ್ತಿಗೆ ತಂದು ಸಮಗ್ರ ಅಭಿವೃದ್ಧಿ ಸಾಧಿಸಲು ‘ನವ ಮೈಸೂರು ನಿರ್ಮಾಣ ಯೋಜನೆ’ ರೂಪಿಸುವ ಬಗ್ಗೆ ಚಿಂತನೆ ನಡೆದಿದೆ’ ಎಂದು ನಗರಾಭಿವೃದ್ಧಿ ಮತ್ತು ನಗರ ಯೋಜನೆ ಸಚಿವ ಬೈರತಿ ಸುರೇಶ್‌ ಹೇಳಿದರು.

ನಗರಾಭಿವೃದ್ಧಿ ಇಲಾಖೆಯ ಅಧಿಕಾರಿಗಳ ಜತೆಗೆ ಗುರುವಾರ ನಡೆಸಿದ ಸಭೆಯಲ್ಲಿ ಅವರು ಈ ವಿಚಾರ ಕುರಿತು ಚರ್ಚಿಸಿದರು. 

‘ಬೆಂಗಳೂರಿನಂತೆಯೇ ಮೈಸೂರು ಸಹ ವೇಗವಾಗಿ ಬೆಳೆಯುತ್ತಿರುವ ನಗರ. ಇಲ್ಲಿ ಐಟಿ, ಬಿಟಿ, ಕೈಗಾರಿಕೆಗಳು ಮತ್ತು ವಸತಿ ಯೋಜನೆಗಳು ಹೆಚ್ಚಾಗುತ್ತಿವೆ. ಜತೆಗೆ ನಗರವೂ ವಿಸ್ತರಣೆಯಾಗುತ್ತಿದೆ. ಇದಕ್ಕೆ ಪೂರಕವಾಗಿ ಸಮಗ್ರ ಯೋಜನೆ ರೂಪಿಸಲು ನಮ್ಮ ಸರ್ಕಾರ ಗಮನ ಹರಿಸಿದೆ’ ಎಂದು ಹೇಳಿದರು.

‘ಸಾರ್ವಜನಿಕ–ಖಾಸಗಿ ಸಹಭಾಗಿತ್ವ ಮಾದರಿಯಲ್ಲಿ ಈ ಯೋಜನೆಯನ್ನು ಅನುಷ್ಠಾನಕ್ಕೆ ತರುವ ಯೋಚನೆ ಇದೆ. ಹೀಗಾಗಿ ಸರ್ಕಾರದ ಮೇಲೆ ಹೆಚ್ಚಿನ ಹೊರೆ ಬೀಳುವುದಿಲ್ಲ. ಉದ್ಯಮಗಳನ್ನು ಆಕರ್ಷಿಸಲು ತ್ವರಿತ ಭೂಮಿ ಹಂಚಿಕೆ, ಮೂಲಸೌಕರ್ಯ ಅಭಿವೃದ್ಧಿಗೆ ಹೆಚ್ಚು ಒತ್ತು ನೀಡಲಾಗುವುದು’ ಎಂದು ತಿಳಿಸಿದರು.

- ಐದು ಆಯಾಮದ ಅಭಿವೃದ್ಧಿ ಉದ್ಯಮ

ಮೈಸೂರು: ಅತ್ಯಾಧುನಿಕ ಕೈಗಾರಿಕಾ ಮತ್ತು ಉತ್ಪಾದನಾ ಹಬ್‌ ಸ್ಥಾಪನೆ ನಿಪುಣ ಮೈಸೂರು: ಕೌಶಲ ಅಭಿವೃದ್ಧಿ ಮತ್ತು ಕೌಶಲಾಧಾರಿತ ಉದ್ಯೋಗ ಸೃಷ್ಟಿಗೆ ಒತ್ತು ಸುಖೀವಾಸ ಮೈಸೂರು: ಸುಸಜ್ಜಿತವಾದ ಸಮಗ್ರ ಟೆಕ್‌ ಸಿಟಿ ನಿರ್ಮಾಣ ಪ್ರವಾಸೋದ್ಯಮ ಮೈಸೂರು: ಪ್ರವಾಸೋದ್ಯಮದ ಭಾಗವಾಗಿ ಸಮಗ್ರ ಆರೋಗ್ಯ ಕ್ಷೇಮ ಮತ್ತು ಪುನಶ್ಚೇತನ ಕೇಂದ್ರ ಆರಂಭ ಸಂಚಾರ ಮೈಸೂರು: ರ‍್ಯಾ‍ಪಿಡ್‌ ಮೆಟ್ರೊ ಯೋಜನೆ