ನೆಲಮಂಗಲ: ನಗರಸಭೆಗೆ ಹೆಚ್ಚುವರಿ ಸದಸ್ಯರ ನೇಮಕ

ನೆಲಮಂಗಲ: ನೆಲಮಂಗಲ ಪುರಸಭೆಯು ನಗರಸಭೆಯಾಗಿ ಮೇಲ್ದರ್ಜೆಗೇರಿದ್ದು, ಇದಕ್ಕೆ ಸೇರ್ಪಡೆಯಾಗಿರುವ ಗ್ರಾಮ ಪಂಚಾಯಿತಿಗಳಿಂದ ನಾಮನಿರ್ದೇಶಿತ ಸದಸ್ಯರನ್ನು ನೇಮಿಸಲಾಗಿದೆ.

ಹಾಲಿ ಇರುವ ನಾಮನಿರ್ದೇಶಿತ ಸದಸ್ಯರ ಬದಲಾಗಿ ಹೊಸದಾಗಿ ನೇಮಕ ಮಾಡಲು ಜಿಲ್ಲಾಧಿಕಾರಿಗಳು ನಗರಾಭಿವೃದ್ಧಿ ಇಲಾಖೆಗೆ ಪ್ರಸ್ತಾವ ಸಲ್ಲಿಸಿದ್ದರು. ಅದರಂತೆ, ವಾಜರಹಳ್ಳಿಯಿಂದ ಬಿ.ಎಸ್‌.ಮುನಿರಾಜು, ಅರಿಶಿನಕುಂಟೆಯಿಂದ ಎಂ.ಲಕ್ಷ್ಮೀನಾರಾಯಣ್‌, ಬಸವನಹಳ್ಳಿಯಿಂದ ಬಿ.ಎನ್‌.ನರಸಿಂಹಮೂರ್ತಿ, ವಿಶ್ವೇಶ್ವರಪುರದಿಂದ ಆರ್‌.ರಂಗಸ್ವಾಮಿ ಅವರನ್ನು ನೇಮಿಸಲಾಗಿದೆ ಎಂದು ನಗರಾಭಿವೃದ್ಧಿ ಇಲಾಖೆ ಅಧಿಸೂಚನೆ ಹೊರಡಿಸಿದೆ.