ಬೆಂಗಳೂರು: ಹೆಬ್ಬಾಳ ವಿಧಾನಸಭಾ ಕ್ಷೇತ್ರದ ವಾರ್ಡ್ ಸಂಖ್ಯೆ 21ರಲ್ಲಿರುವ ರಾಜೀವ್ ಗಾಂಧಿ ದಂತವೈದ್ಯಕೀಯ ಕಾಲೇಜು ಆವರಣದಲ್ಲಿ 100 ಹಾಸಿಗೆಗಳ ಅತ್ಯಾಧುನಿಕ ಕೋವಿಡ್ ಆಸ್ಪತ್ರೆ ಗುರುವಾರ ಉದ್ಘಾಟನೆಯಾಗಲಿದೆ.
’ಖಾಸಗಿ ಆಸ್ಪತ್ರೆಗಳನ್ನೂ ಮೀರಿಸುವಂತೆ ಈ ನೂತನ ಕೋವಿಡ್ ಆಸ್ಪತ್ರೆಯನ್ನು ರೂಪಿಸಲಾಗಿದೆ. 30 ಐಸಿಯು, 40 ಆಮ್ಲಜನಕ ವ್ಯವಸ್ಥೆ, 5 ವೆಂಟಿಲೇಟರ್ ಮತ್ತು 25 ಸಾಮಾನ್ಯ ಹಾಸಿಗೆಗಳ ಈ ಆಸ್ಪತ್ರೆ ಗುರುವಾರ ಉದ್ಘಾಟನೆಯಾಗಲಿದ್ದು, ಎರಡು ದಿನಗಳ ನಂತರ ಸಾರ್ವಜನಿಕ ಸೇವೆಗೆ ಲಭ್ಯವಾಗಲಿದೆ‘ ಎಂದು ಶಾಸಕ ಬೈರತಿ ಸುರೇಶ್ ’ಪ್ರಜಾವಾಣಿ‘ಗೆ ತಿಳಿಸಿದರು.
’ಈ ಆಸ್ಪತ್ರೆಯ ನಿರ್ವಹಣೆಗೆ ಪ್ರತಿ ತಿಂಗಳು ₹1 ಕೋಟಿ ಬೇಕಾಗುತ್ತದೆ. ಬಿಬಿಎಂಪಿ ₹30 ಲಕ್ಷ ಭರಿಸಿದರೆ, ವೈಯಕ್ತಿಕವಾಗಿ ನಾನು ₹30 ಲಕ್ಷ ಹಾಗೂ ಗ್ಲೋಬಲ್ ಟೆಕ್ನಾಲಜೀಸ್ ಕಂಪನಿ, ಪ್ರೆಸಿಡೆನ್ಸಿ ವಿಶ್ವವಿದ್ಯಾಲಯ ಹಾಗೂ ಮಾನ್ಯತೆ ರೋಟರಿ ಸಂಸ್ಥೆಗಳು ಉಳಿದ ₹40 ಲಕ್ಷವನ್ನು ಭರಿಸಲಿವೆ. ಕೋವಿಡ್ ಬಿಕ್ಕಟ್ಟು ಮುಗಿಯುವವರೆಗೆ ಈ ಆಸ್ಪತ್ರೆಯ ಸೇವೆ ಮುಂದುವರಿಯಲಿದೆ‘ ಎಂದು ಅವರು ತಿಳಿಸಿದರು.
ಆರ್.ಟಿ. ನಗರದ ಬಳಿಯ ಚೋಳನಗರದಲ್ಲಿರುವ ಈ ರಾಜೀವ್ ಗಾಂಧಿ ದಂತವೈದ್ಯಕೀಯ ಕಾಲೇಜಿನ ಕೆಲವು ಕೊಠಡಿಗಳನ್ನು ಬಾಡಿಗೆ ಪಡೆದು ಈ ಆಸ್ಪತ್ರೆ ರೂಪಿಸಲಾಗಿದೆ ಎಂದೂ ಅವರು ಮಾಹಿತಿ ನೀಡಿದರು.
ಬೆಳಿಗ್ಗೆ 10.30ಕ್ಕೆ ಉದ್ಘಾಟನಾ ಕಾರ್ಯಕ್ರಮ ನಡೆಯಲಿದೆ. ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಹಾಗೂ ವಸತಿ ಸಚಿವ ವಿ.ಸೋಮಣ್ಣ ಭಾಗವಹಿಸಲಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.