ತೆರಿಗೆ ವಂಚನೆ: ಫೆರಾರಿ ಕಾರು ಮಾಲೀಕನಿಗೆ ₹ 1.41 ಕೋಟಿ ದಂಡ

ಬೆಂಗಳೂರು: ತೆರಿಗೆ ಪಾವತಿಸದೇ ಎರಡು ವರ್ಷಗಳಿಂದ ರಾಜ್ಯದಲ್ಲಿಯೇ ಸಂಚಾರ ನಡೆಸುತ್ತಿದ್ದ ಐಷಾರಾಮಿ ಫೆರಾರಿ ಕಾರನ್ನು ಜಯನಗರ ಪ್ರಾದೇಶಿಕ ಸಾರಿಗೆ ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ. ತೆರಿಗೆ ಮತ್ತು ದಂಡ ಸೇರಿ ₹ 1.41 ಕೋಟಿ ಪಾವತಿಸುವಂತೆ ಕಾರು ಮಾಲೀಕರಿಗೆ ನೋಟಿಸ್‌ ನೀಡಿದ್ದಾರೆ.

ಮಹಾರಾಷ್ಟ್ರದ ನೋಂದಣಿ ಹೊಂದಿರುವ ₹ 7.49 ಕೋಟಿ ವೆಚ್ಚದ ಫೆರಾರಿ ಕಾರನ್ನು ವಶಪಡಿಸಿಕೊಂಡಿದ್ದಾರೆ. ಸಾರಿಗೆ ಇಲಾಖೆ (ಪ್ರವರ್ತನ) ಹೆಚ್ಚುವರಿ ಆಯುಕ್ತ ಸಿ. ಮಲ್ಲಿಕಾರ್ಜುನ ನೇತೃತ್ವದಲ್ಲಿ ಪ್ರಾದೇಶಿಕ ಸಾರಿಗೆ ಅಧಿಕಾರಿ ವಿ.ಪಿ. ರಮೇಶ್‌, ಸಿಬ್ಬಂದಿ ಅಸಾದುಲ್ಲಾ ಬೇಗ್‌, ರಂಜತ್‌ ಎನ್‌., ವಿಜಯಕುಮಾರ್‌, ಮಂಜುನಾಥ್‌, ಗಂಗಸ್ವಾಮಿ ಕಾರ್ಯಾಚರಣೆ ನಡೆಸಿದ್ದರು.