ಬೊಳೆಗಾಂವ: ಸಾವಿನಲ್ಲೂ ಒಂದಾದ ವೃದ್ಧ ದಂಪತಿ

ಹುಲಸೂರ: ಸಮೀಪದ ಭಾಲ್ಕಿ ತಾಲ್ಲೂಕಿನ ಬೊಳೆಗಾಂವ ಗ್ರಾಮದ ನಿವಾಸಿ ಹಾಗೂ ವೃದ್ಧದಂಪತಿ ಬಾಬುರಾವ (85) ಹಾಗೂ ವಿಮಲಾಬಾಯಿ ಬಿರಾದಾರ(80) ಒಂದೇ ದಿನ ನಿಧನರಾದರು.

ವಯೋಸಹಜ ಕಾಯಿಲೆ ಮತ್ತು ಅನಾರೋಗ್ಯದಿಂದ ಬಳಲುತ್ತಿದ್ದ ದಂಪತಿಯಲ್ಲಿ ಪತ್ನಿ ವಿಮಲಾಬಾಯಿ ಬಿರಾದಾರ ಅವರು ಡಿ.29ರ ರಾತ್ರಿ 11 ಗಂಟೆಗೆ ತಮ್ಮ ನಿವಾಸದಲ್ಲಿ ನಿಧನರಾದರೆ, ಪತಿ ಬಾಬುರಾವ ಬಿರಾದಾರ ಡಿ. 30ರಂದು ಬೆಳಿಗ್ಗೆ ಸುಮಾರು 7ಕ್ಕೆ ನಿಧನರಾಗಿದ್ದಾರೆ.

ಸುಮಾರು ಆರು–ಏಳು ದಶಕಗಳ ಕಾಲ ಒಟ್ಟಿಗೆ ಜೀವನ ನಡೆಸಿದ ವೃದ್ಧ ದಂಪತಿ ಸಾವಿನಲ್ಲೂ ಒಂದಾಗಿದ್ದಾರೆ. ಗ್ರಾಮದ ಅವರ ಸ್ವಂತ ಜಮೀನಿನಲ್ಲಿ ಮಂಗಳವಾರ ಪತಿ–ಪತ್ನಿಯ ಅಂತ್ಯಕ್ರಿಯೆ ನಡೆಯಿತು. ಮೃತರಿಗೆ ಒಬ್ಬ ಪುತ್ರ, ಮೂವರು ಪುತ್ರಿಯರು ಇದ್ದಾರೆ.