ಬೀದರ್: ‘ಮಾತೆ ಗಂಗಾದೇವಿ ಹೇಳಿಕೆ ದುರದೃಷ್ಟಕರ’

ಬೀದರ್: ರಾಷ್ಟ್ರೀಯ ಬಸವ ದಳದ ಪದಾಧಿಕಾರಿಗಳ ಹಾಗೂ ಭಕ್ತರ ನಿರ್ಣಯವನ್ನು ಮಾನ್ಯ ಮಾಡದೆ ಬಸವರಾಜ ಧನ್ನೂರು ಅವರನ್ನೇ ರಾಷ್ಟ್ರೀಯ ಬಸವ ದಳದ ರಾಷ್ಟ್ರೀಯ ಅಧ್ಯಕ್ಷ ಸ್ಥಾನದಲ್ಲಿ ಮುಂದುವರಿಸುವುದಾಗಿ ಕೂಡಲಸಂಗಮ ಬಸವ ಧರ್ಮ ಪೀಠಾಧ್ಯಕ್ಷೆ ಮಾತೆಗಂಗಾದೇವಿ ಅವರು ಹೇಳಿಕೆ ನೀಡಿರುವುದು ದುರದೃಷ್ಟಕರ ಎಂದು ಲಿಂಗಾಯತ ಧರ್ಮ ಮಹಾಸಭಾದ ರಾಷ್ಟ್ರೀಯ ಉಪಾಧ್ಯಕ್ಷ ಶಿವರಾಜ ಪಾಟೀಲ ಅತಿವಾಳ ಹಾಗೂ ರಾಷ್ಟ್ರೀಯ ಬಸವ ದಳದ ಮುಖಂಡ ಶಿವಶರಣಪ್ಪ ಪಾಟೀಲ ಹಾರೂರಗೇರಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಚಿತ್ರದುರ್ಗದಲ್ಲಿ ನಡೆದ ಸಭೆಯಲ್ಲಿ ಧನ್ನೂರು ಅವರನ್ನು ಸರ್ವಾನುಮತದಿಂದ ಉಚ್ಚಾಟಿಸಲಾಗಿದೆ ಎಂದು ಪ್ರಕಟಣೆಯಲ್ಲಿ ಹೇಳಿದ್ದಾರೆ.

ಮಾತೆ ಮಹಾದೇವಿ ಅವರು ಬಸವಣ್ಣನವರ ವಚನಗಳಲ್ಲಿ ಸಂಶೋಧನೆ ನಡೆಸಿ ತಾತ್ವಿಕ ಖಚಿತತೆಗಾಗಿ ವಚನಾಂಕಿತದಲ್ಲಿ ಲಿಂಗದೇವ ಅಳವಡಿಸಿದ್ದರು ಎಂದು ತಿಳಿಸಿದ್ದಾರೆ.

10ನೇ ಶರಣ ಮೇಳದಲ್ಲಿ ಮಾತಾಜಿ ಅವರ ಕೊಲೆಗೆ ಯತ್ನಿಸಿದ ಕಾಣದ ಶಕ್ತಿಗಳೇ ಇಂದು ಬಸವರಾಜ ಧನ್ನೂರು ಮೂಲಕ ಬಸವ ಧರ್ಮ ಪೀಠ ಹಾಳು ಮಾಡಲು ಹುನ್ನಾರ ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.