ಬೀದರ್‌ ವಸತಿ ಶಾಲೆಗಳ ಕಳಪೆ ಸಾಧನೆ

ಬೀದರ್‌: ಸಮಾಜ ಕಲ್ಯಾಣ ಇಲಾಖೆಯು ವಸತಿ ಶಾಲೆಗಳ ಎಸ್‌ಎಸ್‌ಎಲ್‌ಸಿ ಪರೀಕ್ಷೆ–1ರ ಫಲಿತಾಂಶ ಘೋಷಿಸಿದ್ದು, ಬೀದರ್‌ ಜಿಲ್ಲೆ ಕಳಪೆ ಸಾಧನೆ ತೋರಿದ್ದು, ರಾಜ್ಯದಲ್ಲಿಯೇ ಜಿಲ್ಲೆ ಕೊನೆಯ ಸ್ಥಾನದಲ್ಲಿದೆ.

ಬೀದರ್‌ ವಸತಿ ಶಾಲೆಗಳಿಗೆ ಶೇ 77.05ರಷ್ಟು ಫಲಿತಾಂಶ ಬಂದಿದೆ. ಜಿಲ್ಲೆಯಲ್ಲಿ ಒಟ್ಟು 29 ವಸತಿ ಶಾಲೆಗಳು ಕೆಲಸ ನಿರ್ವಹಿಸುತ್ತಿವೆ. ಕಲ್ಯಾಣ ಕರ್ನಾಟಕಕ್ಕೆ ಶೇ 87.9ರಷ್ಟು ಫಲಿತಾಂಶ ಬಂದಿದ್ದು, ರಾಜ್ಯದಲ್ಲಿ ಅತಿ ಕಡಿಮೆ ಫಲಿತಾಂಶ ಗಳಿಸಿದೆ. ‌ಕಲ್ಯಾಣ ಕರ್ನಾಟಕದಲ್ಲಿ ವಿಜಯನಗರ ಹಾಗೂ ಕೊಪ್ಪಳ ಜಿಲ್ಲೆಗಳು ಉತ್ತಮ ಸಾಧನೆ ತೋರಿದ್ದು, ಶೇ 95.6ರಷ್ಟು ಫಲಿತಾಂಶ ಗಿಟ್ಟಿಸಿವೆ. ವಿಭಾಗೀಯ ಕೇಂದ್ರವೂ ಆಗಿರುವ ಕಲಬುರಗಿ ಜಿಲ್ಲೆಗೆ ಶೇ 77.13ರಷ್ಟು ಫಲಿತಾಂಶ ಬಂದಿದ್ದು, 30ನೇ ಸ್ಥಾನದಲ್ಲಿದೆ. ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಗಳ ಸೊಸೈಟಿ (ಕೆಆರ್‌ಇಐಎಸ್‌) ಅಡಿ ರಾಜ್ಯದಲ್ಲಿ ವಸತಿ ಶಾಲೆಗಳು ನಡೆಯುತ್ತಿವೆ.

ಬೆಳಗಾವಿ ಉತ್ತಮ ಸಾಧನೆ:

ಬೆಳಗಾವಿ ವಿಭಾಗ ಉತ್ತಮ ಸಾಧನೆ ತೋರಿದ್ದು, ಶೇ 94.4 ಫಲಿತಾಂಶದೊಂದಿಗೆ ಮೊದಲ ಸ್ಥಾನದಲ್ಲಿದೆ. ಶೇ 92.06 ಫಲಿತಾಂಶದೊಂದಿಗೆ ಮೈಸೂರು ವಿಭಾಗ ದ್ವಿತೀಯ ಮತ್ತು ಬೆಂಗಳೂರು ಮೂರನೇ ಸ್ಥಾನದಲ್ಲಿದ್ದು, ಶೇ 90.06 ಫಲಿತಾಂಶ ಬಂದಿದೆ. ಮೈಸೂರು ವಿಭಾಗ ವ್ಯಾಪ್ತಿಯ ಉಡುಪಿ ಮೊದಲ ಸ್ಥಾನದಲ್ಲಿದ್ದು, ಜಿಲ್ಲೆಗೆ ಶೇ 99.04ರಷ್ಟು ಫಲಿತಾಂಶ ಸಂದಿದೆ.