ಸಗಟು, ಚಿಲ್ಲರೆ ಬೆಲೆ ಮಧ್ಯೆ ಭಾರಿ ಅಂತರ
ಚಾಮರಾಜನಗರ: ತರಕಾರಿ ಬೆಲೆಯಲ್ಲಿ ಹೆಚ್ಚಿನ ವ್ಯತ್ಯಾಸವಿಲ್ಲ, ದುಬಾರಿಯಾದ ಬೀನ್ಸ್
ಚಾಮರಾಜನಗರ: ನಗರದ ತರಕಾರಿ ಧಾರಣೆಯಲ್ಲಿ ಸಗಟು ಮತ್ತು ಚಿಲ್ಲರೆ ಬೆಲೆಯ ನಡುವೆ ಭಾರಿ ಅಂತರ ಕಂಡು ಬಂದಿದೆ.
ಎಪಿಎಂಸಿ ಮಾರುಕಟ್ಟೆಯಲ್ಲಿ ಟೊಮೆಟೊ ಸಗಟು ಬೆಲೆ ಶನಿವಾರ ಕೆ.ಜಿಗೆ ₹ 2 ದಾಖಲಾಗಿತ್ತು. ಆದರೆ, ಚಿಲ್ಲರೆ ಬೆಲೆ ಕನಿಷ್ಠ ₹ 5ರಿಂದ ಗರಿಷ್ಠ ₹ 10ರವರೆಗೆ ಇದೆ. ಇದೇ ರೀತಿ ಬೀನ್ಸ್ ಸಗಟು ಧಾರಣೆ ಸಹ ₹ 13 ಇತ್ತು. ಈಗ ಚಿಲ್ಲರೆ ಬೆಲೆ ₹ 30ರಿಂದ ₹ 50 ರವರೆಗೆ ಮಾರಾಟವಾಗುತ್ತಿದೆ.
ಎಲ್ಲ ತರಕಾರಿಗಳ ಬೆಲೆಗಳು ಸಗಟು ಬೆಲೆಯ ಮೂರರಿಂದ ನಾಲ್ಕು ಪಟ್ಟು ಹೆಚ್ಚಿನ ಬೆಲೆಗೆ ಗ್ರಾಹಕರ ಕೈಸೇರುತ್ತಿದೆ. ಇದರ ನಡುವಿನ ಲಾಭ ಮಾತ್ರ ಮಧ್ಯವರ್ತಿಗಳ ಪಾಲಾಗುತ್ತಿದೆ.
ಕಷ್ಟಪಟ್ಟು ಬೆಳೆದ ರೈತ ಎಪಿಎಂಸಿ ಮಾರುಕಟ್ಟೆಗೆ ತಂದರೆ ಅಲ್ಲಿ ಸಿಗುವ ಬೆಲೆಯಿಂದ ಆತ ನಿರಾಶೆಗೊಳ್ಳುತ್ತಾನೆ. ಅದೇ ತರಕಾರಿಯನ್ನು ಖರೀದಿಸುವಾಗ ಹೆಚ್ಚಿನ ಬೆಲೆ ತೆರುವಂತಾಗಿದೆ. ಇದಕ್ಕೆ ಒಟ್ಟಾರೆ ನಗರದ ಮಾರುಕಟ್ಟೆಯಲ್ಲಿನ ದಲ್ಲಾಳಿಗಳ ಹಾವಳಿಯೇ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ.
ಈ ಕುರಿತು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ರೈತ ನಂಜುಂಡಸ್ವಾಮಿ, ‘ನಿಜಕ್ಕೂ ಇದು ದೊಡ್ಡ ದುರಂತ. ಕೇವಲ ಚಾಮರಾಜನಗರ ಮಾತ್ರವಲ್ಲ ರಾಜ್ಯದ ಎಲ್ಲ ಜಿಲ್ಲೆಗಳ ಮಾರುಕಟ್ಟೆಗಳಲ್ಲಿ ಮಧ್ಯವರ್ತಿಗಳ ಹಾವಳಿ ಮಿತಿ ಮೀರಿದೆ. ಇದರಿಂದ ಬೆಲೆಗಳಲ್ಲಿ ಭಾರಿ ವ್ಯತ್ಯಾಸ ಕಂಡು ಬಂದಿದೆ’ ಎಂದು ಹೇಳಿದರು.
ಕುಸಿದ ಕೋಳಿಮೊಟ್ಟೆ ದರ:
ಇತ್ತ ಕೋಳಿ ಮೊಟ್ಟೆ ದರವೂ ಕುಸಿತದ ಹಾದಿಯಲ್ಲಿದೆ. ರಾಷ್ಟ್ರೀಯ ಮೊಟ್ಟೆ ದರ ಸಮನ್ವಯ ಸಮಿತಿಯ ದರವು ಒಂದು ಮೊಟ್ಟೆಗೆ ₹ 3.38ಕ್ಕೆ ನಿಗದಿಪಡಿಸಿದೆ. ಆದರೆ, ಚಿಲ್ಲರೆ ಮಾರುಕಟ್ಟೆಯಲ್ಲಿ ಇದರ ₹ 5–6 ಇದೆ. ಇಲ್ಲೂ ಮಧ್ಯವರ್ತಿಗಳ ಹಾವಳಿ ಮಿತಿ ಮೀರಿದೆ.
ಚಿಕನ್, ಮಟನ್ ದರಗಳಲ್ಲಿ ವ್ಯತ್ಯಾಸ ಇಲ್ಲ
ಚಿಕನ್ ಹಾಗೂ ಮಟನ್ ದರಗಳಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಚಿಕನ್ ದರ ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿಗೆ ₹130ರಿಂದ 150 ಇದೆ. ಮಟನ್ ದರ ₹ 400ರ ಆಸುಪಾಸಿನಲ್ಲಿದೆ.
ತರಕಾರಿಗಳು ಸಗಟು ಬೆಲೆ (ಎಪಿಎಂಸಿ) ಚಿಲ್ಲರೆ ಬೆಲೆ
ಟೊಮೆಟೊ ₹ 01–02 ₹ 05–10
ಬೀನ್ಸ್ ₹ 11–13 ₹ 30–50
ಕ್ಯಾರೇಟ್ ₹ 08–10 ₹ 10–20
ಬೀಟ್ರೂಟ್ ₹ 03–04 ₹ 20
ದಪ್ಪಮೆಣಸಿನಕಾಯಿ – ₹ 20
ಹಸಿರು ಮೆಣಸಿನಕಾಯಿ ₹ 09–10.50 ₹ 20
ಬೆಂಡೆಕಾಯಿ ₹ 19–21 ₹ 20–40
ಬದನೆ ₹ 01–2.50 ₹ 20
**
ಹಣ್ಣುಗಳು ದರ
ಸೇಬು ₹ 80–120
ಮೋಸಂಬಿ ₹ 80
ಕಿತ್ತಳೆ ₹ 80
ಸಪೋಟ ₹ 60
ದ್ರಾಕ್ಷಿ ₹ 100
ದಾಳಿಂಬೆ ₹ 120
ಏಲಕ್ಕಿ ಬಾಳೆ ₹ 60
ಪಚ್ಚಬಾಳೆ ₹ 40
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.