ಕೆರೆ ತುಂಬಿಸಲು ₹475ಕೋಟಿಯ ಟೆಂಡರ್ ಪೂರ್ಣ; ಸಂಕ್ರಾಂತಿ ಬಳಿಕ ಚಾಲನೆ: ಶಾಸಕ ಗಣೇಶ್

ಗುಂಡ್ಲುಪೇಟೆ: 110 ಕೆರೆಗಳಿಗೆ ನೀರು ತುಂಬಿಸುವ ಯೋಜನೆಗೆ 475 ಕೋಟಿ ಅನುದಾನ ಟೆಂಡರ್ ಆಗಿದ್ದು, ಸಂಕ್ರಾಂತಿ ಬಳಿಕ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಆಹ್ವಾನಿಸಿ  ಕಾಮಗಾರಿಗೆ ಚಾಲನೆ ನೀಡಲಾಗುವುದು ಎಂದು ಶಾಸಕ ಎಚ್.ಎಂ.ಗಣೇಶಪ್ರಸಾದ್ ತಿಳಿಸಿದರು.

ತಾಲ್ಲೂಕಿನ ಅಗತಗೌಡನಹಳ್ಳಿ ಗ್ರಾಮದಲ್ಲಿ ₹41 ಲಕ್ಷ ವೆಚ್ಚ ಸಿಸಿ ರಸ್ತೆ, ಚರಂಡಿ ನಿರ್ಮಾಣ ಹಾಗೂ ಮಳವಳ್ಳಿ ಗ್ರಾಮದಲ್ಲಿ ₹ 25 ಲಕ್ಷ ವೆಚ್ಚದಲ್ಲಿ ರಸ್ತೆ ಮತ್ತು ಚರಂಡಿ ನಿರ್ಮಾಣ ಕಾಮಗಾರಿಗೆ  ಚಾಲನೆ ನೀಡಿ ಅವರು ಮಾತನಾಡಿದರು.

ಗುಂಡ್ಲುಪೇಟೆ ಕ್ಷೇತ್ರದ ಬಗ್ಗೆ ಹೆಚ್ಚು ಕಾಳಜಿ ಹೊಂದಿರುವ ಸಿಎಂ, ಡಿಸಿಎಂ ಕೆರೆಗಳಿಗೆ ನೀರು ತುಂಬಿಸಲು ₹475 ಕೋಟಿ ವಿಶೇಷ ಅನುದಾನ ನೀಡಿದ್ದಾರೆ. ಉಳಿಕೆ ಎರಡೂವರೆ ವರ್ಷದ ಅವಧಿಯಲ್ಲಿ ಕಾಮಗಾರಿಯನ್ನು ಶೇ 80ರಷ್ಟು ಮುಗಿಸಬೇಕು ಎಂಬ ನೀರಾವರಿ ಇಲಾಖೆ ಅಧಿಕಾರಿಗಳ ಜೊತೆ ಚರ್ಚಿಸಲಾಗಿದ್ದು, ಅವರೂ ಕೂಡ ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ ಎಂದರು.

ಗುಂಡ್ಲುಪೇಟೆಗೆ ವಿಧಾನ ಸಭಾ ಕ್ಷೇತ್ರಕ್ಕೆ  ಎರಡೂವರೆ ವರ್ಷದ ಅವಧಿಯಲ್ಲಿ ₹85 ಕೋಟಿ ಮುಖ್ಯಮಂತ್ರಿಗಳ ವಿಶೇಷ ಅನುದಾನ ಬಂದಿದೆ. ಪ್ರಸ್ತುತ ₹50 ಕೋಟಿ ಅನುದಾನ ಮಂಜೂರಾಗಿದ್ದು, ಜಿಲ್ಲಾಧಿಕಾರಿ  ಹಂತದಲ್ಲಿದ್ದು,  ಅನುಮೋದನೆ ನೀಡಿದ್ದಾರೆ. ಬೆಳಗಾವಿ ಅಧಿವೇಶನ ಬಳಿಕ ಆ ಕಾಮಗಾರಿ  ಆರಂಭಿಸಲಾಗುವುದು. ಅದರಲ್ಲಿ ₹ 19.25 ಕೋಟಿ ಕೆಆರ್ರ್‌ಡಿಎಲ್ ಸಿಸಿ ರಸ್ತೆಗೆ  ವೆಚ್ಚ ಮಾಡಲಾಗಿದೆ. ₹6 ಕೋಟಿ ಸಮುದಾಯ ಭವನ, ₹4.80 ಕೋಟಿ ದೇವಸ್ಥಾನ, ₹2 ಕೋಟಿ ಮಠಗಳಿಗೆ ನೀಡಲಾಗಿದೆ.  ಪುರಸಭೆಯ ಪ್ರಮುಖ ರಸ್ತೆ ಅಭಿವೃದ್ಧಿಗೆ ₹5 ಕೋಟಿ ಮಂಜೂರು ಮಾಡಲಾಗಿದೆ. ಹಸಗೂಲಿ, ಬೋಗಯ್ಯನಹುಂಡಿ, ರಂಗೂಪುರ, ಕಬ್ಬಹಳ್ಳಿ, ಹಕ್ಕಲಪುರ, ಇತರೆ ಹಲವು ಗ್ರಾಮಗಳಲ್ಲಿ ರಸ್ತೆಗೆ ಬೇಡಿಕೆಯಿದ್ದು,  ನುದಾನ ನೀಡಲಾಗುವುದು ಎಂದು ತಿಳಿಸಿದರು.

ವಿರೋಧ ಪಕ್ಷದವರು 900 ಕೋಟಿ ಎಲ್ಲಿದೆ ತೋರಿಸಿ: ಬಿಜೆಪಿ ಅಧಿಕಾರದಲ್ಲಿದ್ದಾಗ 900 ಕೋಟಿ ಅಭಿವೃದ್ಧಿ ಕಾಮಗಾರಿ ಮಾಡಿದ್ದೇವೆ ಎಂದು ಹೇಳುತ್ತಿದ್ದಾರೆ.  ವಿರೋಧ ಪಕ್ಷದವರ ಟೀಕೆಗೆ ಹೆದರಿಕೊಳ್ಳುವುದಿಲ್ಲ. ಉತ್ತರವನ್ನೂ ಕೊಡುವುದಿಲ್ಲ ಎಂದು ಹೇಳಿದರು.

 ‘ ಹತ್ತಿ ಮಾರುಕಟ್ಟೆ, ಅಂಬೇಡ್ಕರ್ ವಸತಿ ಶಾಲೆ, ಮೊರಾರ್ಜಿ ದೇಸಾಯಿ ಶಾಲೆ, ಕೋಲ್ಡ್ ಸ್ಟೋರೇಜ್, ವಿದ್ಯುತ್ ಉಪ ಕೇಂದ್ರ, ದೇವರಾಜ ಅರಸು ಕ್ರೀಡಾಂಗಣದ ಕಾಂಪೌಂಡ್ ನಿರ್ಮಾಣ, ಅಂಬೇಡ್ಕರ್ ಭವನಕ್ಕೆ ₹1 ಕೋಟಿ, ವಾಲ್ಮೀಕಿ ಸಮುದಾಯ ಭವನಕ್ಕೆ ₹1 ಕೋಟಿ, ಕನಕ ಭವನಕ್ಕೆ ₹75 ಲಕ್ಷ ಸೇರಿದಂತೆ ಎಸ್.ಸಿ.ಪಿ ಅನುದಾನದಲ್ಲಿ ಗ್ರಾಮೀಣ ಪ್ರದೇಶಗಳ ರಸ್ತೆ ನಿರ್ಮಾಣ, ಟಿ.ಎಸ್.ಪಿ ಅಡಿಯಲ್ಲಿ ಗಿರಿಜನ ಕಾಲೊನಿಗಳ ಅಭಿವೃದ್ಧಿಗೆ ಕ್ರಮ ವಹಿಸಲಾಗಿದೆ’ಎಂದು ತಿಳಿಸಿದರು.

ಎಪಿಎಂಸಿ ಅಧ್ಯಕ್ಷ ರಂಗೂಪುರ ನಾಗರಾಜು, ಹಾಪ್ ಕಾಮ್ಸ್ ಅಧ್ಯಕ್ಷ ನಾಗೇಶ್, ಜಿಪಂ ಮಾಜಿ ಉಪಾಧ್ಯಕ್ಷ ಕಬ್ಬಹಳ್ಳಿ ಮಹೇಶ್, ಮೋಹನ್ ದಾಸ್, ನೇನೆಕಟ್ಟೆ ಗ್ರಾಒಂ ಅಧ್ಯಕ್ಷ ನಂದೀನ್, ಉಪಾಧ್ಯಕ್ಷ ಬಿ.ಎಸ್.ನಾಗೇಂದ್ರ, ಜಿಪಂ ಮಾಜಿ ಸದಸ್ಯ ಚನ್ನಪ್ಪ, ಮಹದೇವಪ್ಪ, ತಾಪಂ ಮಾಜಿ ಉಪಾಧ್ಯಕ್ಷ ಗಂಗಾಧರಪ್ಪ ಮಧು, ಶಿವಪ್ರಸಾದ್  ಭಾಗವಹಿಸಿದ್ದರು.