ಹೂವು, ತರಕಾರಿ ಬೆಲೆ ಕುಸಿತ, ಹಣ್ಣು ಸ್ಥಿರ

ಚಾಮರಾಜನಗರ: ಆಷಾಢ ಮಾಸದ ಆರಂಭದಲ್ಲೇ ಮಾರುಕಟ್ಟೆಯಲ್ಲಿ ಹೂವುಗಳ ಬೆಲೆಯಲ್ಲಿ ಭಾರಿ ಕುಸಿತವಾಗಿದೆ. ತರಕಾರಿಗಳ ಬೆಲೆಯೂ ಇಳಿಮುಖವಾಗಿದೆ. ಹಣ್ಣುಗಳ ಬೆಲೆ ಸ್ಥಿರವಾಗಿದೆ.

ಮಲ್ಲಿಗೆಯ ಬೆಲೆ ₹100ರಷ್ಟು ಇಳಿಕೆಯಾಗಿದೆ. ಕಳೆದ ವಾರ ₹300ರಷ್ಟಿದ್ದ ಕೆ.ಜಿ ಮಲ್ಲಿಗೆ ಬೆಲೆ ಸೋಮವಾರ ₹200 ಇತ್ತು. ಸೂಜಿ ಮಲ್ಲಿಗೆಯ ಬೆಲೆ ಕೂಡ ₹240ರಿಂದ ₹160ಕ್ಕೆ ಕುಸಿದಿದೆ.

ಅರ್ಧದಷ್ಟು ಇಳಿಕೆ: ಕನಕಾಂಬರದ ಬೆಲೆಯಲ್ಲಿ ಅರ್ಧದಷ್ಟು ಇಳಿಕೆಯಾಗಿದೆ. ಕಳೆದ ವಾರ‌ ಕೆ.ಜಿ ಕನಕಾಂಬರಕ್ಕೆ ₹800 ಇತ್ತು. ಸೋಮವಾರ ₹400ಕ್ಕೆ ಇಳಿದಿದೆ.

ಕುಸಿತ: ತರಕಾರಿಗಳ ಪೈಕಿ ಬೀನ್ಸ್‌, ಸುವರ್ಣಗೆಡ್ಡೆ, ಶುಂಠಿ, ಬೀಟ್‌ರೂಟ್‌, ತೊಂಡೆಕಾಯಿ, ಹೀರೇಕಾಯಿ, ಬಜಿ ಮೆಣಸಿನಕಾಯಿ ಅಗ್ಗವಾಗಿವೆ. ಹಸಿಮೆಣಸಿನಕಾಯಿ, ಸೌತೆಕಾಯಿ ಬೆಲೆ ಸ್ವಲ್ಪ ಹೆಚ್ಚಾಗಿದೆ.

ತೆಂಗಿನಕಾಯಿ ಬೆಲೆಯೂ ಕಡಿಮೆಯಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ₹20ಕ್ಕೆ ತೆಂಗಿನಕಾಯಿ ಸಿಗುತ್ತಿದೆ.

ಚಿಲ್ಲರೆ ಮಾರುಕಟ್ಟೆಯಲ್ಲಿ ಕಳೆದ ವಾರ ₹60 ಇದ್ದ ಸುವರ್ಣಗೆಡ್ಡೆಗೆ ಸೋಮವಾರ₹40 ಇತ್ತು. ಕೆ.ಜಿಶುಂಠಿ ₹50ಕ್ಕೆ ಸಿಗುತ್ತಿದೆ. ಹೋದವಾರ ₹80 ಇತ್ತು. ಬೀನ್ಸ್‌ಗೆ ₹30 ಇದೆ. ತೊಂಡೆಕಾಯಿ ₹40, ಬಜಿ ಮೆಣಸಿನಕಾಯಿ ₹60ಕ್ಕೆ ಮಾರಾಟವಾಗುತ್ತಿದೆ. ಸೌತೆಕಾಯಿ ಬೆಲೆ ₹30 (ಹೋದವಾರ ₹20) ಮತ್ತು ಹಸಿಮೆಣಸಿನಕಾಯಿ ₹60ಕ್ಕೆ ಏರಿದೆ.

ಉಳಿದಂತೆ ಟೊಮೆಟೊ (₹15), ಈರುಳ್ಳಿ (₹25), ಮೂಲಂಗಿ (₹20), ಹೂಕೋಸು (₹40), ಆಲೂಗೆಡ್ಡೆ (₹25), ಕ್ಯಾರೆಟ್‌ (₹20), ಗೆಡ್ಡೆಕೋಸು (40) ಸೇರಿದಂತೆ ಹಲವು ತರಕಾರಿಗಳ ಬೆಲೆಯಲ್ಲಿ ಬದಲಾವಣೆಯಾಗಿಲ್ಲ.

ತಳ್ಳುಗಾಡಿಗಳಲ್ಲಿ ವ್ಯಾಪಾರ ಮಾಡುತ್ತಿರುವವರು ಮಾರುಕಟ್ಟೆ ದರಕ್ಕಿಂತ ₹5ರಿಂದ ₹10 ಕಡಿಮೆ ದರಕ್ಕೆ ತರಕಾರಿಗಳನ್ನು ಮಾರಾಟ ಮಾಡುತ್ತಿದ್ದಾರೆ.