ಚಾಮರಾಜನಗರ: ತರಕಾರಿಗಳು, ಹೂವಿನ ಬೆಲೆ ಕುಸಿತ

ಚಾಮರಾಜನಗರ: ನಗರದ ಮಾರುಕಟ್ಟೆಯಲ್ಲಿ ಈ ವಾರ ಹೆಚ್ಚಿನತರಕಾರಿಗಳ ಬೆಲೆ ಇಳಿಮುಖವಾಗಿದೆ. ಹೂವಿನ ಧಾರಣೆ ಮತ್ತಷ್ಟು ಕುಸಿದಿದೆ. ಕೆಲವು ಹಣ್ಣುಗಳ ಬೆಲೆಯಲ್ಲಿ ಏರಿಳಿತ‌ ಕಂಡು ಬಂದಿದೆ.

ತರಕಾರಿ ಮಾರುಕಟ್ಟೆಯಲ್ಲಿ ಎರಡು ಮೂರು ವಾರಗಳಿಂದ ಏರು‌ಮುಖವಾಗಿ ಸಾಗಿದ್ದ ಬೀನ್ಸ್ ಬೆಲೆ ಈ ವಾರ ಏಕಾಏಕಿ ಕುಸಿದಿದೆ. ಹಾಪ್ ಕಾಮ್ಸ್‌ನಲ್ಲಿ ಕಳೆದ ವಾರದ ಆರಂಭದಲ್ಲಿ ₹60 ಇದ್ದ ಬೀನ್ಸ್ ಬೆಲೆ, ಸೋಮವಾರ ₹30ಗೆ ಕುಸಿದಿತ್ತು.

ಉಳಿದಂತೆ ಟೊಮೆಟೊ ಬೆಲೆ ಕೆಜಿಗೆ ₹5, ಕ್ಯಾರೆಟ್‌ ಕೆಜಿಗೆ ₹10, ಈರುಳ್ಳಿ ₹5, ಬೆಳ್ಳುಳ್ಳಿ ₹20, ಹಸಿಮೆಣಸಿನ ಕಾಯಿ ₹10 ಕಡಿಮೆಯಾಗಿದೆ. ಕಳೆದ ವಾರ ಇವುಗಳ ಬೆಲೆ ಕ್ರಮವಾಗಿ ಕೆಜಿಗೆ ₹20, ₹40, ₹30, ₹80 ಹಾಗೂ ₹40 ಇತ್ತು.

ಬೀನ್ಸ್‌, ಕ್ಯಾರೆಟ್‌, ಟೊಮೆಟೊ ಹೆಚ್ಚಿನ ಪ್ರಮಾಣದಲ್ಲಿ ಮಾರುಕಟ್ಟೆಗೆ ಬರುತ್ತಿದೆ. ಹಾಗಾಗಿ ಬೆಲೆಯಲ್ಲಿ ಇಳಿಮುಖವಾಗಿದೆ. ಉಳಿದ ತರಕಾರಿಗಳಿಗೂ ಬೇಡಿಕೆ ಕಡಿಮೆಯಾಗಿರುವುದರಿಂದ ಧಾರಣೆ ಕುಸಿದಿದೆ ಎಂದು ಹಾಪ್‌ಕಾಮ್ಸ್‌ ವ್ಯಾಪಾರಿ ಮಧು ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಹಣ್ಣುಗಳ ಪೈಕಿ ದಾಳಿಂಬೆ ₹20 ತುಟ್ಟಿಯಾಗಿದೆ. ಕಿತ್ತಳೆ ₹10 ಅಗ್ಗವಾಗಿದೆ. ಕಳೆದವಾರ ಕೆಜಿಗೆ ₹100–₹120ರಷ್ಟಿದ್ದ ದಾಳಿಂಬೆ ಬೆಲೆ ಸೋಮವಾರ ₹140 ಇತ್ತು. ಕಿತ್ತಳೆ ಬೆಲೆ ಕಳೆದವಾರ ₹80 ಇತ್ತು. ಅದೀಗ ₹70ಕ್ಕೆ ಇಳಿದಿದೆ.

ಉಳಿದಂತೆ ಸೇಬು (₹100), ಮೂಸಂಬಿ (₹60), ದ್ರಾಕ್ಷಿ (₹120) ಏಲಕ್ಕಿ ಬಾಳೆ (₹40) ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ.

ಮಾಂಸದ ಮಾರುಕಟ್ಟೆಯಲ್ಲಿ (ಚಿಲ್ಲರೆ) ಕೆಜಿ ಮಟನ್‌ ಬೆಲೆ ₹560 ಇದೆ. ಚಿಕನ್‌ ಬೆಲೆ ₹200–₹220ರವರೆಗೆ ಇದೆ.

ಹೂವಿನ ಬೆಲೆ ಮತ್ತಷ್ಟು ಕುಸಿತ: ಬಿಡಿಹೂವಿನ ಮಾರುಟ್ಟೆಯಲ್ಲಿ ಹೂವಿನ ಧಾರಣೆ ಈ ವಾರ ಮತ್ತಷ್ಟು ಕುಸಿದಿದೆ. ಬೇಡಿಕೆ ಹೆಚ್ಚಾಗಲು ನವರಾತ್ರಿವರೆಗೂ ಕಾಯಬೇಕು ಎಂದು ಹೇಳುತ್ತಾರೆ ವ್ಯಾಪಾರಿಗಳು.

ಕೆಜಿಗೆ ₹600 ಇದ್ದ ಕನಕಾಂಬರ ₹400ಕ್ಕೆ ಇಳಿದಿದೆ. ಸೇವಂತಿಗೆಗೂ ಬೇಡಿಕೆ ಕುಸಿದಿದ್ದು, ಕೆಜಿಗೆ ₹30ರಂತೆ ಸೋಮವಾರ ಮಾರಾಟವಾಗಿದೆ. ಚೆಂಡು ಹೂವನ್ನು ಕೇಳುವವರೆ ಇಲ್ಲದಂತಾಗಿದೆ. ಕೆಜಿಗೆ ₹10 ಬೆಲೆ ಇದೆ. ಮಲ್ಲಿಗೆ ಮಾರುಕಟ್ಟೆಗೆ ಬರುತ್ತಿಲ್ಲ. ಕಾಕಡದ ಬೆಲೆ ಕೆಜಿಗೆ ₹60 ಇದೆ.

‘ಈ ವಾರ ಹೂವುಗಳ ಬೆಲೆ ಮತ್ತಷ್ಟು ಇಳಿದಿದೆ. ಇನ್ನೆರಡು ವಾರ ಇದೇ ಪರಿಸ್ಥಿತಿ ಇರಬಹುದು. ದಸರಾ ಸಮಯದಲ್ಲಿ ಬೇಡಿಕೆ ಹೆಚ್ಚಾಗುತ್ತದೆ. ಆಗ ಬೆಲೆಯೂ ಏರಿಕೆಯಾಗಲಿದೆ’ ಎಂದು ಬಿಡಿ ಹೂವಿನ ವ್ಯಾಪಾರಿ ರವಿ ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.