ಯುವಜನರಿಂದ ಸುಭದ್ರ ಪ್ರಜಾಪ್ರಭುತ್ವ ವ್ಯವಸ್ಥೆ

ಚಿಕ್ಕಬಳ್ಳಾಪುರ: ದೇಶದಲ್ಲಿ ಪ್ರಜಾ­ಪ್ರಭು­ತ್ವದ ತಳಪಾಯ ಇನ್ನೂ ಗಟ್ಟಿ­ಯಾಗಿ ಉಳಿಯಬೇಕಿದ್ದರೆ, ಯುವ­ಜನರು ಆಸ­ಕ್ತಿ­ಯಿಂದ ಚುನಾವಣಾ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳಬೇಕು ಎಂದು ಜಿಲ್ಲಾ ಪಂಚಾಯತಿ ಮುಖ್ಯಕಾರ್ಯನಿರ್ವ­ಹಣಾ­ಧಿಕಾರಿಯೂ ಆಗಿರುವ ‘ಸ್ವೀಪ್‌’ ಮತದಾನ ಜಾಗೃತಿ ಅರಿವು ಸಮಿತಿ ಅಧ್ಯಕ್ಷೆ ನೀಲಾ ಮಂಜುನಾಥ್‌ ತಿಳಿಸಿ­ದರು.

ಕೇಂದ್ರ ಚುನಾವಣಾ ಆಯೋಗ, ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತಿ, ಎನ್ಎಸ್‌ಎಸ್‌ ಘಟಕದ ಸಹಯೋಗ­ದಲ್ಲಿ ನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಬುಧವಾರ ನಡೆದ ‘ಸುಭದ್ರ ಕ್ರಿಯಾಶೀಲ ಪ್ರಜಾಪ್ರಭುತ್ವಕ್ಕೆ ಮತದಾನದ ಮಹತ್ವ’ ಕುರಿತ ವಿಚಾರ ಸಂಕಿರಣದಲ್ಲಿ ಮಾತನಾಡಿದರು.

ವಿಶ್ವದ ಬೇರೆ ದೇಶಗಳಿಗೆ ಹೋಲಿ­ಸಿದರೆ ನಮ್ಮ ದೇಶದಲ್ಲೇ ಯುವಜನರು ಹೆಚ್ಚಿನ ಸಂಖ್ಯೆಯಲ್ಲಿದ್ದು, 18ನೇ ವಯಸ್ಸಿಗೆ ಮತದಾನ ಮಾಡುವ ಹಕ್ಕು ಪಡೆದಿದ್ದಾರೆ. ಚುನಾವಣೆಯ ಮೂಲಕ ದೇಶದ ನಾಯಕತ್ವದ ಭವಿಷ್ಯ ನಿರ್ಧರಿಸ­ಲಾಗುವುದರಿಂದ ಅರ್ಹರೆಲ್ಲರೂ ಮತ­ದಾನ ಪ್ರಕ್ರಿಯೆಯಲ್ಲಿ ಆಸಕ್ತಿಯಿಂದ ಭಾಗವಹಿಸಬೇಕು ಎಂದು ಅವರು ಸಲಹೆ ಮಾಡಿದರು.

ಮತದಾನ ಪ್ರಮಾಣ ಕುಸಿಯ­ಬಾರದು ಮತ್ತು ಯುವಜನರು ಚುನಾ­ವಣೆಯಿಂದ ವಿಮುಖಗೊಳ್ಳಬಾರದು ಎಂಬ ಸದುದ್ದೇಶದಿಂದ ‘ಸ್ವೀಪ್‌’ ಮತದಾನ ಜಾಗೃತಿ ಅಭಿಯಾನ ಕೈಗೊಂಡಿದೆ. ಸ್ವೀಪ್‌ ಕಾರ್ಯಕ್ರಮದಡಿ ಬರೀ ವಿಚಾರ ಸಂಕಿರಣ ನಡೆಸುವುದಲ್ಲ, ಪ್ರಬಂಧ, ಓಟ, ಭಾಷಣ ಸ್ಪರ್ಧೆ ಮುಂತಾದವು ಹಮ್ಮಿಕೊಳ್ಳಲಾಗು­ವುದು. ಚುನಾವಣೆ ಕುರಿತು ಯುವಜನ­ರಲ್ಲಿ ಆಸಕ್ತಿ ಮೂಡಿಸಲಾಗುವುದು ಎಂದು ಅವರು ತಿಳಿಸಿದರು.

ಶಿಕ್ಷಣ ತಜ್ಞ ಪ್ರೊ. ಕೋಡಿರಂಗಪ್ಪ ಮಾತನಾಡಿ, ದೇಶದಲ್ಲಿ ಸುಭದ್ರ ಮತ್ತು ಸ್ಥಿರ ಸರ್ಕಾರ ನೆಲೆಗೊಳ್ಳ­ಬೇಕಿದ್ದರೆ, ಜನರ ಪಾಲ್ಗೊಳ್ಳುವಿಕೆ ತುಂಬಾ ಮುಖ್ಯವಾಗುತ್ತದೆ. ಮತ­ದಾರರು ಚಲಾಯಿಸುವ ಒಂದೊಂದು ಮತವು ತುಂಬಾ ಮುಖ್ಯವಾಗಿದ್ದು, ಅದು ಸಮರ್ಥ ಜನಪ್ರತಿನಿಧಿಯ ಆಯ್ಕೆಗೆ ಸಹಕರಿಸುತ್ತದೆ. ಆದ್ದರಿಂದ ನಾವು ಮತದಾನದಿಂದ ವಿಮುಖರಾಗ­ಬಾರದು ಎಂದರು.

ಮತ ಚಲಾಯಿಸದೇ ನಂತರ ನಾಯ­ಕತ್ವದ ಬಗ್ಗೆ ಪಶ್ಚಾತ್ತಾಪ ಪಡುವುದ­ಕ್ಕಿಂತ ಮತ ಚಲಾಯಿಸಿ ಸೂಕ್ತ ನಾಯಕರನ್ನು ಆಯ್ಕೆ ಮಾಡುವುದು ಸರಿ. ಬಹುತೇಕ ದೇಶಗಳಲ್ಲಿ ಕಿರಿಯ ವಯಸ್ಸಿನವರಿಗೆ ಮತ್ತು ಮಹಿಳೆಯರಿಗೆ ಮತ ಚಲಾಯಿಸಲು ಅವಕಾಶ ನೀಡುವುದಿಲ್ಲ. ಆದರೆ ನಮ್ಮ ದೇಶದಲ್ಲಿ ಆ ಅವಕಾಶ ನೀಡಿರುವುದು ಹೆಮ್ಮೆಯ ಸಂಗತಿ ಎಂದರು.

ಪ್ರಾಧ್ಯಾಪಕಿ ಡಾ.ಜಿ.ಸುಧಾ ಮಾತ­ನಾಡಿ, ಚುನಾವಣೆ ಸಂದರ್ಭದಲ್ಲಿ ಆಸೆ–ಆಮಿಷ, ಬೆದರಿಕೆ ಒಡ್ಡುತ್ತಾರೆ. ಆದರೆ ಅದ್ಯಾವುದಕ್ಕೂ ಅಂಜದೇ ತಮ್ಮ ಮನಸ್ಸಿಗೆ ಒಪ್ಪುವ ಮತ್ತು ಸಮರ್ಥ­ರೆಂದೇ ಗುರುತಿಸುವ ವ್ಯಕ್ತಿ ಪರ ಮತ ಚಲಾಯಿಸಿ ಎಂದರು.

ವಾರ್ತಾ ಇಲಾಖೆ ಸಹಾಯಕ ನಿರ್ದೇಶಕಿ ಡಾ.ಕೆ.ಎನ್‌.ಕವನಾ, ಕಾಲೇಜು ಪ್ರಾಂಶುಪಾಲ ಕೃಷ್ಣಪ್ಪ, ಪ್ರಾಧ್ಯಾ­ಪಕರಾದ ಚಂದ್ರಪ್ಪ, ರಾಮ­ಕೃಷ್ಣ, ರವಿಕುಮಾರ್‌ ಮತ್ತಿತರರು ಉಪಸ್ಥಿತರಿದ್ದರು.