ಗೌರಿಬಿದನೂರು: ರೇಬಿಸ್ ನಿಯಂತ್ರಣ ಅರಿವು

ಗೌರಿಬಿದನೂರು: ತಾಲ್ಲೂಕು ಆಡಳಿತ ಕಚೇರಿಯ ಸಭಾಂಗಣದಲ್ಲಿ, ರಾಷ್ಟ್ರೀಯ ರೋಗವಾಹಕ ಆಶ್ರಿತ ರೋಗಗಳ ನಿಯಂತ್ರಣ ಕಾರ್ಯಕ್ರಮದಡಿ ರೇಬಿಸ್ ನಿಯಂತ್ರಣ ಅಂತರ್ ಇಲಾಖಾ ಸಮನ್ವಯ ಸಭೆ ಮಂಗಳವಾರ ನಡೆಯಿತು.

ತಹಶೀಲ್ದಾರ್ ಮಹೇಶ್ ಪತ್ರಿ ಮಾತನಾಡಿ, ‘ಜನವರಿಯಿಂದ ಸೆಪ್ಟೆಂಬರ್‌ವರೆಗೆ ತಾಲ್ಲೂಕಿನಲ್ಲಿ 2,500 ನಾಯಿ ಕಚ್ಚಿದ ಪ್ರಕರಣ ದಾಖಲಾಗಿವೆ. ಮನೆಗಳಲ್ಲಿ ಸಾಕಿರುವ ನಾಯಿಗಳಿಗೂ ಸಹ ಕಾಲ ಕಾಲಕ್ಕೆ ಚುಚ್ಚುಮದ್ದನ್ನು ಹಾಕಿಸಬೇಕು. ಎಲ್ಲ ಇಲಾಖೆಗಳ ಸಮನ್ವಯತೆಯೊಂದಿಗೆ, ರೇಬಿಸ್, ಚಿಕನ್‌ಗುನ್ಯಾ, ಮಲೇರಿಯಾ, ಮಿದುಳು ಜ್ವರ ತಡೆಗಟ್ಟಬಹುದು’ ಎಂದರು.

ತಾಲ್ಲೂಕು ಆರೋಗ್ಯ ಅಧಿಕಾರಿ ಚಂದ್ರಮೋಹನ್ ರೆಡ್ಡಿ ಮಾತನಾಡಿ, ‘ರೇಬಿಸ್, ಚಿಕನ್ ಗುನ್ಯಾ, ಕಾಲರಾ ಮುಂತಾದ ಕಾಯಿಲೆಗಳ ಬಗ್ಗೆ ಶಾಲಾ, ಕಾಲೇಜುಗಳಲ್ಲಿ ಮತ್ತು ಹಾಸ್ಟೆಲ್‌ಗಳಲ್ಲಿ ಅರಿವು ಮೂಡಿಸಲಾಗುತ್ತಿದೆ’ ಎಂದರು.

ಬಿಇಒ ಶ್ರೀನಿವಾಸ್ ಮೂರ್ತಿ. ಚಿನ್ನಪ್ಪಗೌಡ ನಾಯ್ಕರ್, ಗೋಪಾಲ್, ವನಜಾಕ್ಷಿ, ಸತೀಶ್, ಡಾ.ರೋಹಿತ್ ಕುಮಾರ್ ಹಾಜರಿದ್ದರು.