ಕೊಪ್ಪ | ‘ನರೇಗಾ’ ಸದ್ಭಳಕೆ: ಮಾದರಿಯಾದ ಹೊನ್ನಮ್ಮ

ಕೊಪ್ಪ: ಕೃಷಿಯನ್ನು ನೆಚ್ಚಿಕೊಂಡು ಬದುಕು ನಡೆಸುತ್ತಿರುವ ತಾಲ್ಲೂಕಿನ ಬಿಂತ್ರವಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ತಲಮಕ್ಕಿ ನಿವಾಸಿ ಹೊನ್ನಮ್ಮ, ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯನ್ನು(ನರೇಗಾ) ಸಮರ್ಪಕವಾಗಿ ಬಳಸಿಕೊಳ್ಳುವ ಮೂಲಕ ಕೃಷಿ ಮತ್ತು ವೈಯಕ್ತಿಕ ಜೀವನದಲ್ಲಿ ಸುಧಾರಣೆ ಕಂಡುಕೊಂಡಿದ್ದಾರೆ.

ನರೇಗಾ ಯೋಜನೆಯಡಿ ವಿವಿಧ ಕಾಮಗಾರಿಗಳಾದ ಜಾನುವಾರು ಸಾಕಾಣಿಕಾ ಶೆಡ್ ನಿರ್ಮಾಣ, ಕೃಷಿ ಬಾವಿ ನಿರ್ಮಾಣ, ಅಡಿಕೆ ಮತ್ತು ಸಿಲ್ವರ್‌ ಗಿಡ ನಾಟಿಗೆ ನೆರವು ಪಡೆದುಕೊಂಡಿದ್ದಾರೆ. 2013-14ನೇ ಸಾಲಿನ ಬಸವ ವಸತಿ ಯೋಜನೆಯಡಿ ಮನೆಗೆ ಹೆಚ್ಚುವರಿ ಸಹಾಯಧನ ಹಾಗೂ ಕೋಳಿ ಸಾಕಾಣಿಕಾ ಶೆಡ್ ನಿರ್ಮಿಸಿಕೊಂಡಿದ್ದಾರೆ. 2018-19ನೇ ಸಾಲಿನ ಕೃಷಿ ಅರಣ್ಯ ಕಾಮಗಾರಿ ಹಾಗೂ ಬಚ್ಚಲು ನೀರಿಗೆ ಇಂಗುಗುಂಡಿ ಮಾಡಿಕೊಂಡಿದ್ದಾರೆ.

‘ನರೇಗಾ ಯೋಜನೆಯಡಿ ವೈಯಕ್ತಿಕ ಹಾಗೂ ಸಮುದಾಯ ಕಾಮಗಾರಿಗಳನ್ನು ಮಾಡಿಕೊಳ್ಳಲು ಅವಕಾಶವಿದೆ. ಒಬ್ಬ ಫಲಾನುಭವಿಗೆ ₹5 ಲಕ್ಷ ಮೊತ್ತದ ಕಾಮಗಾರಿ ಕೈಗೊಳ್ಳಲು ಅವಕಾಶವಿದೆ. ದನದಕೊಟ್ಟಿಗೆ ನಿರ್ಮಾಣಕ್ಕೆ  ₹57,000, ಕುರಿಶೆಡ್‌ಗೆ ₹70,000, ಎರೆಹುಳುತೊಟ್ಟಿಗೆ ₹20,000, ತೆರೆದಬಾವಿ ಮರು ನಿರ್ಮಾಣ ₹30,000, ಕೋಳಿಶೆಡ್‌ ₹60,000, ಬಚ್ಚಲು ಗುಂಡಿ ₹11,000, ಕೃಷಿ ಬಾವಿ ₹1.50 ಲಕ್ಷ ಸಹಾಯಧನ ನೀಡಲಾಗುತ್ತಿದೆ' ಎಂದು ತಾಲ್ಲೂಕು ಪಂಚಾಯಿತಿಯ ಮಾಹಿತಿ, ಶಿಕ್ಷಣ ಸಂಯೋಜಕಿ ಸುಮಲತಾ ಬಜಗೋಳಿ ಹೇಳಿದರು.