ಕಡೂರು | ರೈತರ ಬದುಕು ಹಸನಾಗಿಸುವ ಪ್ರಯತ್ನ: ಕೆ.ಎಸ್‌.ಆನಂದ್‌

ಕಡೂರು: ‘ತಾಲ್ಲೂಕಿನ ಹಿರಿಮೆ ಮತ್ತು ರೈತರ ಜೀವನಾಡಿಯಾಗಿರುವ ಮದಗದ ಕೆರೆ ಅಭಿವೃದ್ಧಿಗೆ ಚಾಲನೆ ನೀಡುವ ಮೂಲಕ ರೈತರ ಬದುಕು ಹಸನಾಗಿಸುವ ಪ್ರಯತ್ನಕ್ಕೆ ಒತ್ತು ನೀಡಲಾಗಿದೆ’ ಎಂದು ಶಾಸಕ ಕೆ.ಎಸ್‌.ಆನಂದ್‌ ಹೇಳಿದರು.

ತಾಲ್ಲೂಕಿನ ಎಮ್ಮೆದೊಡ್ಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಮದಗದ ಕೆರೆಗೆ ಶುಕ್ರವಾರ ಬಾಗಿನ ಅರ್ಪಿಸಿ, ₹50 ಕೋಟಿ ವೆಚ್ಚದ ಕೆರೆ ಅಚ್ಚುಕಟ್ಟು ವ್ಯಾಪ್ತಿಯ ವಿವಿಧ ಅಭಿವೃದ್ಧಿ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು.

ಮದಗದ ಕೆರೆಯ ಅಚ್ಚುಕಟ್ಟು ವ್ಯಾಪ್ತಿಯನ್ನು ಸಂಪೂರ್ಣ ಅಭಿವೃದ್ಧಿ ಪಡಿಸಲು ₹200 ರಿಂದ ₹220 ಕೋಟಿ ವೆಚ್ಚವಾಗಬಹುದು. ಆದರೆ, ಸಣ್ಣ ನೀರಾವರಿ ಇಲಾಖೆ ವತಿಯಿಂದ ಒಮ್ಮೆಲೆ ಅಷ್ಟು ಅನುದಾನ ಸಿಗುವ ಸಾಧ್ಯತೆ ಇಲ್ಲ. ಆದ್ದರಿಂದ ಸಮಗ್ರ ಯೋಜನಾ ವರದಿ ತಯಾರಿಸಿ ಸರ್ಕಾರಕ್ಕೆ ಸಲ್ಲಿಸಿ, ಮೊದಲ ಹಂತವಾಗಿ ₹50 ಕೋಟಿ ಅನುದಾನಕ್ಕೆ ಅನುಮೋದನೆ ಪಡೆಯಲಾಗಿದೆ. ಇದರಲ್ಲಿ ಕೆರೆ ಅಭಿವೃದ್ಧಿಗೆ ₹7.50 ಕೋಟಿ, 14 ಕಿ.ಮೀ. ರಾಜಕಾಲುವೆ ಮತ್ತು ಮಧ್ಯೆ ಬರುವ 22 ಮಡುಬಾಯಿ ಮತ್ತು ತಡೆಗೋಡೆ, ಸೇತುವೆಗಳನ್ನು ನೂತನವಾಗಿ ನಿರ್ಮಿಸಲಾಗುವುದು ಎಂದು ಮಾಹಿತಿ ನೀಡಿದರು.

ಮದಗದ ಕೆರೆ ಅಭಿವೃದ್ಧಿ ಕಾರ್ಯ ನಿರಂತರವಾಗಿರಲಿದೆ. ರಾಜಕಾಲುವೆಗಳ ಆಧುನೀಕರಣದಿಂದ ನೀರು ಪೋಲಾಗುವುದು ತಪ್ಪಿ ಕಡೆಯ ಭಾಗದ ರೈತರಿಗೂ ನೀರು ಸಿಗಲಿದೆ, ಜತೆಗೆ ಹೆಚ್ಚುವರಿ ಭೂಮಿಗೂ ನೀರು ಹರಿಯಲಿದೆ. ಕೃಷಿಕರ ಬದುಕಿಗೆ ಬೆಳಕು ತುಂಬುವ ಪ್ರಾಮಾಣಿಕ ಪ್ರಯತ್ನದ ಫಲವಾಗಿ ಭದ್ರಾ ಉಪಕಣಿವೆ ಯೋಜನೆಯ 3ನೇ ಹಂತಕ್ಕೂ ಹಣ ಬಿಡುಗಡೆಯಾಗಿದೆ. ವಿಶ್ವೇಶ್ವರಯ್ಯ ಜಲನಿಗಮದವರು ಈ ಯೋಜನೆ ಅನುಷ್ಠಾನವನ್ನು ತ್ವರಿತವಾಗಿ ಮುಗಿಸಿಕೊಡಲೇಬೇಕು. ಬರುವ ಜೂನ್‌ ಒಳಗೆ ಭದ್ರಾ ನೀರು ಮದಗದಕೆರೆಗೆ ಹರಿಯಲಿದೆ ಎನ್ನುವುದು ನಮ್ಮ ಭರವಸೆಯಾಗಿದೆ. ಅಧಿವೇಶನದ ನಂತರ 3ನೇ ಹಂತದ ಕಾಮಗಾರಿಗೆ ಮುಖ್ಯಮಂತ್ರಿಯವರೇ ಚಾಲನೆ ನೀಡಲಿದ್ದಾರೆ. ಕಾಮಗಾರಿಗೆ ಅನುದಾನದ ಕೊರತೆ ಏನೂ ಇಲ್ಲ. ಆದ್ದರಿಂದ ಎಂಜಿನಿಯರ್‌ ಮತ್ತು ಗುತ್ತಿಗೆದಾರರು ಯೋಜನೆಯನ್ನು ಕಾಲಮಿತಿಯ ಒಳಗೆ ಮುಗಿಸಿಕೊಡಬೇಕು. ಇದರಿಂದ ತಾಲ್ಲೂಕಿನ 118 ಕೆರೆಗಳಿಗೆ ಭದ್ರಾನದಿಯ ನೀರು ಹರಿದು ಕಡೂರು ಕ್ಷೇತ್ರದ ಬರದ ಹಣೆಪಟ್ಟಿ ಶಾಶ್ವತವಾಗಿ ಕಳಚಲಿದೆ ಎಂದು ಹೇಳಿದರು.

3ನೇ ಹಂತದಲ್ಲಿ ಕಡೂರು–ಕಸಬಾ ಸೇರಿ ಜೋಡಿತಿಮ್ಮಾಪುರ, ಹುಲ್ಲೇಹಳ್ಳಿ, ಹಿರೇನಲ್ಲೂರು ಮೊದಲಾದ ಕಡೆಗಳಿಗೆ ನೀರು ಹರಿಯಲಿದೆ. ಈ ಭಾಗದ ಜನರ ಕಾಯುವಿಕೆ ಹಾಗೂ ರೈತರ ಸಂಕಷ್ಟಗಳಿಗೂ ಮುಕ್ತಿ ದೊರೆಯಲಿದೆ. ಮುಂದಿನ ವರ್ಷ ಮದಗದ ಕೆರೆಗೆ ಭದ್ರಾ ನೀರು ಹರಿಸಿದ ನಂತರವೇ, ಕೆರೆಗೆ ಬಾಗಿನ ಅರ್ಪಿಸಲಾಗುವುದು. ಕ್ಷೇತ್ರದ ಅಭಿವೃದ್ಧಿಗೆ ಬೆನ್ನುತಟ್ಟಿ ಪ್ರೋತ್ಸಾಹಿಸುತ್ತಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌ ಮತ್ತು ಕಡೂರು ಇತಿಹಾಸದಲ್ಲಿ ಕೆರೆ ಅಭಿವೃದ್ಧಿಗೆ ಒಮ್ಮೆಲೆ ₹50 ಕೋಟಿ ಹಣ ಮಂಜೂರು ಮಾಡಿದ ಸಣ್ಣ ನೀರಾವರಿ ಸಚಿವ ಎನ್‌.ಎಸ್‌. ಬೋಸರಾಜು ಅವರನ್ನು ಈ ವೇದಿಕೆಯಿಂದ ಅಭಿನಂದಿಸುವುದಾಗಿ ತಿಳಿಸಿದರು.

ವಿಜೆಎನ್‌ಎಲ್‌ ಕಡೂರು ಘಟಕ ಕಾರ್ಯಪಾಲಕ ಎಂಜಿನಿಯರ್‌ ಹರ್ಷ, ಮುಖಂಡರಾದ ಭಂಡಾರಿ ಶ್ರೀನಿವಾಸ್‌, ಶರತ್‌ ಕೃಷ್ಣಮೂರ್ತಿ, ಕೆ.ಎಂ. ಮೋಹನ್‌ಕುಮಾರ್‌, ಎನ್‌. ದೇವರಾಜ್‌, ಪಂಚನಹಳ್ಳಿ ಪ್ರಸನ್ನ, ಎಂ.ಎಚ್‌. ಚಂದ್ರಪ್ಪ, ಆಸಂದಿ ಕಲ್ಲೇಶ್‌ ಮಾತನಾಡಿದರು.

ತಹಶೀಲ್ದಾರ್‌ ಸಿ.ಎಸ್‌. ಪೂರ್ಣಿಮಾ, ತಾಲ್ಲೂಕು ಪಂಚಾಯಿತಿ ಇಒ ಸಿ.ಆರ್‌. ಪ್ರವೀಣ್‌, ಎಮ್ಮೆದೊಡ್ಡಿ ಗ್ರಾಮ ಪಂಚಾಯಿತಿ ಅಧ್ಯಕ್ಷ ವೈ.ಎನ್‌. ಛಾಯಾಪತಿ, ಮುಖಂಡರಾದ ಎಚ್‌.ವಿ. ಗಿರೀಶ್‌, ಶಾಂತಪ್ಪ ಒಡೆಯರ್‌, ಕಡೂರು-ಬೀರೂರು ಅಡಿಕೆ ಬೆಳೆಗಾರರ ಸಂಘದ ಕೆ.ಎಚ್‌. ಶಂಕರ್‌, ಎಂ.ಆರ್‌. ಸೋಮಶೇಖರ್‌, ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ, ಸದಸ್ಯರು, ತಾಲ್ಲೂಕಿನ ವಿವಿಧೆಡೆಗಳಿಂದ ಬಂದಿದ್ದ ರೈತರು, ಸಣ್ಣ ನೀರಾವರಿ ಇಲಾಖೆ ಎಇಇ ದಕ್ಷಿಣಾಮೂರ್ತಿ, ಮಂಜುನಾಥ್‌ ಮತ್ತು ಸುತ್ತಮುತ್ತಲ ಗ್ರಾಮಸ್ಥರು ಇದ್ದರು.