ಕ್ರೀಡಾಪಟುವಿಗೆ ಆರ್ಥಿಕ ನೆರವಿಗೆ ಕ್ರಮ: ಸಿಎಂ

ಚಿತ್ರದುರ್ಗ: ಥ್ರೋಬಾಲ್‌ ಕ್ರೀಡಾ ಪಟುವಿಗೆ ಆರ್ಥಿಕ ನೆರವು ನೀಡುವ ಸಂಬಂಧ ಕ್ರಮ ಕೈಗೊಂಡು, ಈ ಮಾಹಿತಿಯನ್ನು ಕಚೇರಿಗೆ ಒದಗಿಸಿ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೆಚ್ಚುವರಿ ಜಿಲ್ಲಾಧಿಕಾರಿಗೆ ಸೂಚಿಸಿದರು.

ಮುರುಘಾ ಮಠದ ಹೆಲಿಪ್ಯಾಡ್‌ಗೆ ಬುಧವಾರ ಬಂದ ಅವರನ್ನು ಥ್ರೋಬಾಲ್‌ ಕ್ರೀಡಾಪಟು ಜಿ.ವೈಶಾಲಿ ಭೇಟಿ ಮಾಡಿದರು. ಆರ್ಥಿಕ ನೆರವು ಕೋರಿ ಮನವಿ ಸಲ್ಲಿಸಿದರು.

ಹಿರಿಯೂರು ತಾಲ್ಲೂಕಿನ ವದ್ದಿಕೆರೆಯ ವೈಶಾಲಿ ಬಡಕುಟುಂಬದ ಕ್ರೀಡಾಪಟು. ಮಲೇಶಿಯಾದಲ್ಲಿ ಡಿಸೆಂಬರ್‌ನಲ್ಲಿ ನಡೆಯಲಿರುವ ಅಂತರರಾಷ್ಟ್ರೀಯ ಮಹಿಳಾ ಥ್ರೋಬಾಲ್‌ ಕ್ರೀಡಾಕೂಟಕ್ಕೆ ಅವರು ಆಯ್ಕೆಯಾಗಿದ್ದಾರೆ. ಭಾರತೀಯ ತಂಡವನ್ನು ಪ್ರತಿನಿಧಿಸಲಿರುವ ಅವರಿಗೆ ಲಕ್ಷಾಂತರ ರೂಪಾಯಿ ಅಗತ್ಯವಿದೆ. ಈ ಸಂಗತಿಯನ್ನು ವೈಶಾಲಿ ಅವರು ಮುಖ್ಯಮಂತ್ರಿಗೆ ಮನವರಿಕೆ ಮಾಡಿಕೊಟ್ಟರು.