ಚಳ್ಳಕೆರೆ | ಕಾರು, ಬೈಕ್ ಡಿಕ್ಕಿ; ಇಬ್ಬರ ಸಾವು

ಚಳ್ಳಕೆರೆ: ನಗರದ ಹೊರ ವಲಯದ ವೀರದಿಮ್ಮನಹಳ್ಳಿ ಗ್ರಾಮದ ಕ್ರಾಸ್‌ನಲ್ಲಿರುವ ರಾಷ್ಟ್ರೀಯ ಹೆದ್ದಾರಿ (150–ಎ)ಯಲ್ಲಿ ಮಂಗಳವಾರ ಕಾರು ಡಿಕ್ಕಿ ಹೊಡೆದ ಪರಿಣಾಮ ಬೈಕಿನಲ್ಲಿ ಕುಳಿತಿದ್ದ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಕಾರು ಚಾಲಕ ಗಾಯಗೊಂಡಿದ್ದಾರೆ. 

ತಾಲ್ಲೂಕಿನ ತಳುಕು ಗ್ರಾಮದ ಬಿ. ಅಭಿಷೇಕ್ (28) ಮತ್ತು ಕೆ. ಮಂಜುಳಾ (32) ಮೃತರು.

ತೀವ್ರ ಗಾಯಗೊಂಡಿದ್ದ ಕಾರು ಚಾಲಕ, ರಾಯಚೂರು ಜಿಲ್ಲೆಯ ಸಂಕನಹಾಳ್ ಗ್ರಾಮದ ನಾಗರೆಡ್ಡಪ್ಪ (35)ಅವರನ್ನು ನಗರದ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ನಾಗರೆಡ್ಡಪ್ಪ, ಮಂಗಳವಾರ ಮಧ್ಯಾಹ್ನ ಚಳ್ಳಕೆರೆ ಕಡೆಯಿಂದ ಬಳ್ಳಾರಿ ಮಾರ್ಗವಾಗಿ ಸಾಗುತ್ತಿದ್ದರು. ಕಾರನ್ನು ವೇಗವಾಗಿ ಚಾಲನೆ ಮಾಡಿಕೊಂಡು ಹೋಗಿ ಬೈಕಿಗೆ ಡಿಕ್ಕಿ ಹೊಡೆದಿದ್ದಾರೆ ಎನ್ನಲಾಗಿದೆ. ಚಾಲಕನ ವಿರುದ್ಧ ಪ್ರಕರಣ ದಾಖಲು ಮಾಡಿಕೊಳ್ಳಲಾಗಿದೆ ಎಂದು ಪಿಎಸ್‍ಐ ಈರೇಶ್ ತಿಳಿಸಿದ್ದಾರೆ.