ಬಂಟ್ವಾಳ: ಬಂದ್ ಬಹುತೇಕ ಯಶಸ್ವಿ

ಬಂಟ್ವಾಳ: ನದಿ ತಿರುವು ಯೋಜನೆ­ಯನ್ನು ವಿರೋಧಿಸಿ ಸೋಮವಾರ ನಡೆದ ಬಂದ್ ಬಂಟ್ವಾಳ ತಾಲ್ಲೂಕಿ­ನಲ್ಲಿ ಕೂಡಾ ಬಹುತೇಕ ಯಶಸ್ವಿ­ಯಾಗಿದೆ.

ತಾಲ್ಲೂಕಿನಾದ್ಯಂತ ಕೆಲವೊಂದು ಔಷಧಿ ಅಂಗಡಿ ಮತ್ತು ಆಸ್ಪತ್ರೆಗಳು ಹಾಗೂ ಬ್ಯಾಂಕ್ ಮತ್ತಿತರ ಸರ್ಕಾರಿ ಕಚೇರಿಗಳು ಮಾತ್ರ ತೆರದಿದ್ದರೂ ಜನರಿಲ್ಲದೆ ಬಿಕೋ ಎನ್ನುತ್ತಿತ್ತು. ಬೆಳಿಗ್ಗೆಯಿಂದಲೇ ಬಸ್ ಮತ್ತು ರಿಕ್ಷಾ ಸಂಚಾರ ಸ್ಥಗಿತಗೊಂಡಿತ್ತು.

ಬಹುತೇಕ ಶಾಲಾ ಕಾಲೇಜುಗಳು ಬೆಳಿಗ್ಗೆ ತೆರೆದಿದ್ದು, ವಿದ್ಯಾರ್ಥಿಗಳ ಕೊರತೆಯಿಂದಾಗಿ ಮಧ್ಯಾಹ್ನ ಬಳಿಕ ಸ್ವಯಂ ರಜೆ ಘೋಷಿಸಿದವು.
ತಾಲ್ಲೂಕಿನ ಗ್ರಾಮೀಣ ಮತ್ತು ನಗರ ಪ್ರದೇಶಗಳಲ್ಲಿ ಬಹುತೇಕ ಎಲ್ಲಾ ಅಂಗಡಿ ಮುಂಗಟ್ಟುಗಳು ಮುಚ್ಚಿ­ಕೊಂಡು ವ್ಯಾಪಾರ ವಹಿ­ವಾಟು ನಡೆಸದೆ ಬಂದ್‌ಗೆೆ ಬೆಂಬಲ ವ್ಯಕ್ತಪಡಿಸಿದರು. ಬಿ.ಸಿ.ರೋಡ್ ಪೇಟೆಯಲ್ಲಿ ಸೋಮವಾರ ಜನ­ಸಂಚಾರ ಇಲ್ಲದೆ ಬಸ್‌ನಿಲ್ದಾಣ, ತಾಲ್ಲೂಕು ಕಚೇರಿ, ನ್ಯಾಯಾಲಯ ಆವರಣಗಳು ಖಾಲಿ ಇದ್ದವು.