ಐದು ವರ್ಷಗಳಲ್ಲಿ ಕ್ಯಾಂಪ್ಕೊ ವಹಿವಾಟು ಶೇ 70 ಏರಿಕೆ

ಮಂಗಳೂರು: ದಿ ಸೆಂಟ್ರಲ್ ಅರೆಕಾನಟ್ ಅಂಡ್ ಕೊಕ್ಕೋ ಮಾರ್ಕೆಟಿಂಗ್ ಆ್ಯಂಡ್‌ ಪ್ರೊಸೆಸಿಂಗ್ ಕೋ-ಆಪರೇಟಿವ್ ಲಿಮಿಟೆಡ್ (ಕ್ಯಾಂಪ್ಕೊ) ಸಂಸ್ಥೆಯು ಐದು ವರ್ಷಗಳಲ್ಲಿ ಶೇ 70ರಷ್ಟು ಬೆಳವಣಿಗೆ ಸಾಧಿಸಿದ್ದು, 2020–21ನೇ ಸಾಲಿನಲ್ಲಿ ₹2,134 ಕೋಟಿ ಇದ್ದ ವಹಿವಾಟು 2024–25ನೇ ಸಾಲಿನಲ್ಲಿ ₹3,631 ಕೋಟಿಗೆ ಏರಿಕೆಯಾಗಿದೆ ಎಂದು ಕ್ಯಾಂಪ್ಕೊ ಅಧ್ಯಕ್ಷ ಕಿಶೋರ್‌ಕುಮಾರ್ ಕೊಡ್ಗಿ ಹೇಳಿದರು.

ಶನಿವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಐದು ವರ್ಷದ ಹಿಂದೆ ಹೊಸ ಅಡಿಕೆ ಕೆ.ಜಿ.ಗೆ ₹240–₹320 ಇತ್ತು, ಈಗ ₹360ರಿಂದ ₹485 ಆಗಿದೆ. ಚಾಲಿ ಅಡಿಕೆ ₹320ರಿಂದ ₹380 ಇತ್ತು. ಈಗ ₹360ರಿಂದ ₹525ಕ್ಕೆ ತಲುಪಿದೆ. ಕೆಂಪು ಅಡಿಕೆ ಕೆ.ಜಿ.ಗೆ ₹350ರಿಂದ ₹398 ಇತ್ತು. ಈಗ ₹545ರಿಂದ ₹585ಕ್ಕೆ ತಲುಪಿದೆ. ಕ್ಯಾಂಪ್ಕೊ ರೈತರಿಗೆ ನ್ಯಾಯಯುತ ಬೆಲೆ ಒದಗಿಸಲು ಶ್ರಮಿಸಿದೆ ಎಂದರು.

ವಿಸ್ತರಣಾ ಚಟುವಟಿಕೆಯ ಭಾಗವಾಗಿ ‘ಸೌಗಂಧ್’ ಕಾಜು ಸುಪಾರಿ ಮರುಬಿಡುಗಡೆ, ಮಾಲ್ದೀವ್ಸ್‌ಗೆ ಅಡಿಕೆ ರಫ್ತು ಆರಂಭಿಸಲಾಗಿದೆ. ಕ್ಯಾಂಪ್ಕೊ ಆಯುಷ್, ಪೌಷ್ಟಿಕ, ಡಾಲಮೈಟ್ ಮೊದಲಾದ ಕೃಷಿ ಗೊಬ್ಬರ ಉತ್ಪನ್ನಗಳನ್ನು ಪರಿಚಯಿಸಲಾಗಿದೆ. ಹೊಸ ಉತ್ಪನ್ನಗಳಾದ ಡೈರಿ ಡ್ರೀಮ್, ಫಿಯೆಸ್ಟಾ, ಎಕ್ಲೇರ್ಸ್, ಡೋಮ್ ಟ್ರಫಲ್ಸ್, ಮತ್ತು ಡಾರ್ಕ್ ಚಾಕೊಲೇಟ್‌ಗಳನ್ನು ಬಿಡುಗಡೆ ಮಾಡಲಾಗಿದೆ ಎಂದು ಹೇಳಿದರು.

ಕ್ಯಾಂಪ್ಕೊ ಉಪಾಧ್ಯಕ್ಷ ಶಂ.ನಾ. ಖಂಡಿಗೆ, ನಿರ್ದೇಶಕರಾದ ಎಸ್‌.ಆರ್‌.ಸತೀಶ್ಟಂದ್ರ, ದಯಾನಂದ ಹೆಗ್ಡೆ, ಸುರೇಶ್‌ ಶೆಟ್ಟಿ, ಕೃಷ್ಣ ಪ್ರಸಾದ್‌ ಮಡ್ತಿಲ, ಬಾಲಕೃಷ್ಣ ರೈ, ದಯಾನಂದ ಹೆಗ್ಡೆ, ರಾಧಾಕೃಷ್ಣ, ಸತ್ಯನಾರಾಯಣ ಪ್ರಸಾದ್‌, ರಾಘವೇಂದ್ರ, ಜಯಪ್ರಕಾಶ್‌, ರಾಘವೇಂದ್ರ ಭಟ್‌ ಪುತ್ತೂರು, ಎಂಡಿ ಸತ್ಯನಾರಾಯಣ, ಪ್ರಧಾನ ವ್ಯವಸ್ಥಾಪಕಿ ರೇಷ್ಮಾ ಮಲ್ಯ, ಅಡಕೆ ಸಂಶೋಧನಾ ಪ್ರತಿಷ್ಠಾನ ಅಧಿಕಾರಿ ಕೇಶವ ಭಟ್‌ ಇದ್ದರು.